१५ असार २०८३, सोमबार
शल्यक्रियाबाट प्रसूति गराउने क्रममा एक महिलाको मृत्यु भएपछि चिकित्सकको लापरबाही भन्दै आफन्तले लहान–३ स्थित डिभाइन हेल्थ केयर अस्पतालमा तोडफोड गरेका छन् ।
सुखीपुर–९ बैसाखा मोहनपुरीकी २७ वर्षीया आरती साहको शल्यक्रियाका क्रममा शनिबार साँझ ८ बजे मृत्यु भएको थियो । घटनापछि आक्रोशित आफन्तले तोडफोड गरेपछि अस्पतालका स्वास्थ्यकर्मी र कर्मचारी भागेका छन् ।
मृतकका आफन्तले आइतबार बिहान पूर्वपश्चिम राजमार्गमा २ घण्टा आवागमन अवरुद्ध पार्नुका साथै अस्पताल अगाडि दिनभर प्रदर्शन गरेका छन् ।
‘डाक्टरको लापरबाहीले मेरी पत्नीको मृत्यु भएको हो,’ प्रमोद साहले भने, ‘लापरबाही गर्नेलाई कारबाही हुनुपर्छ ।’ आक्रोशितको भीडले अस्पतालको गेटमै रहेको फार्मेसीका औषधि, फर्निचरलगायत फाल्नुका साथै सिसा तोडफोड गरेको छ । शल्यक्रियाका क्रममा आमाको मृत्यु भए पनि नवजात शिशु भने सकुशल छन् । उनलाई त्यहाँबाट सप्तऋषि अस्पतालमा सारिएको छ । जेठो छोरा ८ वर्षको भएपछि आरतीलाई दोस्रो सन्तानको जन्मका लागि अस्पताल लगिएको थियो । आरतीको अपरेसन अस्पताल सञ्चालकसमेत रहेका डा. चन्द्रशेखर यादवसहित चार जनाको टोलीले गरेको थियो ।
‘अपरेसनबाट छोरी जन्मिएपछि राति साढे ७ बजेसम्म डाक्टरले आरतीलाई ठीकै छ भनेका थिए,’ प्रमोदले भने, ‘त्यसपछि डा. यादवसहित अस्पतालका स्वास्थ्यकर्मी र कर्मचारी एक–एक गरी ९ बजेभित्रै सबै निस्किए ।’ शल्यक्रिया गर्ने क्रममा आरतीको मृत्यु भएपछि मृतकलाई त्यत्तिकै छाडेर डाक्टरसहित सबै एक–एक गरी भागेको पीडितका आफन्तले बताए । अस्पतालविरुद्ध प्रमोदले प्रहरीमा उजुरी दर्ता गराएका छन् । अस्पतालका स्वास्थ्यकर्मी र कर्मचारी मोबाइल अफ गरेर सम्पर्कविहीन भइ बसेका छन् । शव पोस्टमार्टमका लागि धरान पठाएर घटनाको छानबिन भइरहेको इलाका प्रहरी कार्यालय लहानका डीएसपी शरत थापा क्षत्रीले बताए ।
जिल्ला प्रशासन कार्यालयले पनि घटनाको छानबिन गर्न समिति गठन गरेको छ । स्वास्थ्य कार्यालय प्रमुख कृष्णदेव यादवको संयोजकत्वको समितिले उक्त अस्पतालको सञ्चालन अनुमतिसँगै घटनाको छानबिन थालेको जनाएको छ ।
स्थानीय सरकार सञ्चालन ऐनमा १५ शय्यासम्मको अस्पताल सञ्चालन अनुमति स्थानीय तहबाटै दिन सकिने प्रावधान छ । लहानमा लहान अस्पताल, सप्तऋषि अस्पताल र पिपुल लिभिङ गरी तीनवटा अस्पतालले मात्र सञ्चालन अनुमति लिएको नगरपालिकाका स्वास्थ्य प्रमुख रामसुन्दर यादवले बताए । कान्तिपुर दैनिकमा भरत जर्घामगरले खबर लेखेका छन् ।
