अदालतले धरौटीमा छाडेपछि ६ वर्षीया बालिकालाई बलात्कार गरी हत्या, स्थानीय आक्रोशित

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

महोत्तरीको बर्दिबास नगरपालिकामा ६ वर्षीया बालिकालाई बलात्कार गरेर हत्या गरेको आरोपमा पक्राउ परेका अरुणकुमार साह यसअघि पनि हत्या आरोपमा पक्राउ परेर छुटेको रहस्य खुलेको छ ।

महोत्तरीको इलाका प्रहरी कार्यालय गौशालाका प्रहरी निरीक्षक प्रकाश रेग्मीका अनुसार उनी यसअघि पनि हत्या आरोपमा पक्राउ परेका तर अदालतको आदेशबाट धरौटीमा रिहा भएका थिए ।


Advertisement

लकडाउनको बेला २०७७ वैशाख २८ गते गाउँले दिलीप ठाकुरको हत्या गरेको आरोप अरुणमाथि छ । ‘दिलीप र अरुण दुवै जना रक्सीको अम्मली थिए, सँगै रक्सी खाएर आउने बेला दुवै जनाबीच झगडा भएर ढुंगाले एकअर्कामाथि हानाहान भएको थियो,’ प्रहरी निरीक्षक रेग्मीले लोकान्तरसँग भने, ‘चोट त अरुणलाई पनि लागेको थियो तर अरुणले हानेको ढुंगाले दिलीपको मृत्यु नै भएको थियो ।’

त्यतिबेला पनि हत्या आरोपमा साहलाई पक्राउ गरेर कर्तव्य ज्यान मुद्दा नै चलाइएको उनले बताए । ‘तर थुनछेक आदेशको क्रममा महोत्तरी जिल्ला अदालतले उनलाई धरौटीमा रिहा गर्ने आदेश दिएका कारण उनी रिहा भएका थिए,’ रेग्मीले भने, ‘अदालतको आदेशविरुद्ध उच्च अदालत जनकपुरमा पुनरावेदन समेत गरिएको छ तर आदेश भने आइसकेको छैन ।’


Advertisement

अरुणको मूलघर महोत्तरीको गौशाला नगरपालिका–५ मा छ भने अर्को घर बर्दिबास नगरपालिका–१४ मा छ । बर्दिबासको घरमा उनले पसल थापेर व्यापार गर्दै आएका थिए ।

बर्दिबासका स्थानीय सहिद आलमकी ६ वर्षीया छोरी गुलाब साह खातून मंसिर ७ गते साँझदेखि हराएकी थिइन् । पसलमा ‘चक्लेट’ किन्न गएकी बालिकालाई अरुणले अपहरण गरेर राखेका थिए । साँझ परेपछि बलात्कार गरेर हत्या गरी पोकामा राखेर फालेर आफ्नो गाउँ गौशाला गएका थिए ।

‘उसले बालिकाको हत्या गरेर फालेको कुरा आफ्नो घरपरिवारमा समेत बताएका रहेछन्,’ प्रहरी निरीक्षक रेग्मीले भने, ‘उसको पारिवारिक स्रोतबाट नै हत्याको कुरा प्रहरीमा जानकारी आएको तथा परिवारका सदस्यले नै उसलाई प्रहरी कार्यालय गौशालामा ल्याएर सोमवार राति १२ बजे बुझाएका थिए ।’

राति नै अरुणलाई बर्दिबास लगेर बालिकाको शव फालेको स्थानमा लगेर प्रहरीले शव बरामद गरेको थियो । 

इलाका प्रहरी कार्यालय बर्दिबासका प्रहरी नायव उपरीक्षक राजन चापागाईंका अनुसार पक्राउ परेका अरुणले आरोप स्वीकार गरिसकेका छन् । बालिका हत्याको विरोध गर्दै स्थानीयले बर्दिबासस्थित राजमार्गमा टायर जलाएर विरोध प्रदर्शन गर्नुका साथै आरोपी अरुणको बर्दिबासस्थित घरमा आगो समेत लगाएका छन् ।

प्रहरीले भीडलाई नियन्त्रणमा लिन १ दर्जनभन्दा बढी अश्रुग्यास तथा केही राउन्ड हवाई फायर समेत गरेका छन् । 

स्थानीयले बलात्कारी तथा हत्यारालाई ‘फाँसी देऊ’ भन्दै शव समेत सडकमा राखेर नाराबाजी गरिरहेका छन् ।

अजय अनुरागी
अजय अनुरागी

लेखकबाट थप...

कमेन्ट गर्नुहोस्