१० साउन २०८३, आइतबार
बंगलादेशले आइतवार भुटानसँग पहिलोपटक विशेषधिकारयुक्त व्यापार सम्झौता गरेको छ । यसले दुई देशबीचको व्यापार प्रवर्द्धन गर्नेछ ।
बंगलादेशका वाणिज्यमन्त्री टिपु मुन्शी र भुटानका आर्थिक मामिला मन्त्री ल्योन्पो लोकनाथ शर्माले सम्झौतामा हस्ताक्षर गरेका छन् ।
बंगलादेशकी प्रधानमन्त्री शेख हसिना र भुटानका प्रधानमन्त्री लोटे छिरिङले आआफ्नो आधिकारिक निवासबाट उक्त हस्ताक्षर समारोहमा भर्चुअल सहभागिता जनाएका थिए ।
बंगलादेश स्वतन्त्र भएदेखि पहिलोपटक यस्तो किसिमको द्विपक्षीय व्यापार सम्झौता गरेको हो ।
आइतवार अर्थात् डिसेम्बर ६ को दिन नै सन् १९७१ मा बंगलादेशको स्वतन्त्रतालाई पहिचान गर्ने संसारको पहिलो मुलुक भुटान बनेको थियो ।
बंगलादेश र भुटानबीचको कूटनीतिक सम्बन्धको ५०औं वार्षिकोत्सव पनि मनाइँदैछ ।
यस सम्झौतासँगै बंगलादेशका १०० वटा उत्पादनले भुटानमा आयातकररहित पहुँच पाउनेछन् । भुटानका चाहिँ ३४ उत्पादनले बंगलादेशको बजारमा पहुँच पाउनेछन् ।
दुवै देशले पारस्परिक सल्लाहबमोजिम वस्तुको संख्या बढाउनेछन् ।
दुई देशबीचको द्विपक्षीय व्यापारको दर आर्थिक वर्ष २०१८–१९ मा ४ करोड ९६ लाखभन्दा बढी थियो ।
