०७ असार २०८३, आइतबार
सुस्ताएको पर्यटन चलायमान बनाउन पश्चिमाञ्चल होटल संघ पोखराले बुधवारदेखि ४ दिने ‘जाऔं है पोखरा अभियान’ शुरू गरेको छ ।
कोभिड–१९ को महामारीमा आन्तरिक पर्यटन प्रवद्र्धन गर्न संघले मंसिर २४ देखि २७ गतेसम्म ४ दिने भ्रमण कार्यक्रमको शुरूआत गरिएको संघका अध्यक्ष विकल तुलाचनले जानकारी दिए ।
जनकपुर, पर्सा, वीरगञ्ज, विराटनगर र चितवनलाई समेटिएको अभियानमा अन्र्तगत ती स्थानमा पत्रकार सम्मेलन, प्रदेशस्तरीय, स्थानीय सरकारी तथा गैरसरकारी र पर्यटन व्यवसायी लगायतका सरोकार पक्षसँग अन्तर्क्रिया गरिने जनाइएको छ । पहिलो दिन वीरगञ्जमा स्थानीय सरकार, पत्रकार र पर्यटन व्यवसायीबीच अन्तर्क्रिया हुनेछ ।
संघले १८ वर्षदेखि सो अभियान शुरू गर्दै आएको छ । कोरोनाले सुस्ताएको पर्यटनलाई जगाउनु नै मुख्य उद्देश्य भएको आन्तरिक पर्यटन पुनरोत्थान समिति गण्डकीका सहसंयोजक समेत रहेका तुलाचनले बताए ।
अभियानका कार्यक्रममा होटल सञ्चालक, पर्यटन व्यवसायी, नेपाल पर्यटन बोर्डका प्रतिनिधि र पत्रकार सहभागिता रहनेछन् । संक्रमण जारी रहे पनि कोरोना सँगसँगै स्वास्थ्य सतर्कतासहित पर्यटन चलायमान बनाउनुको विकल्प नरहेकाले जाऔं है पोखरा कार्यक्रमलाई निरन्तरता दिएको आयोजकले जनाएको छ ।
