२३ जेठ २०८३, शनिबार
भारतको लद्दाखस्थित एक गाउँमा चिनियाँ सैनिकहरू प्रवेश गरेको द टाइम्स अफ इन्डियाले खबर दिएको छ । उनीहरू दुईवटा गाडीमा बसेर भारतीय क्षेत्रमा आएको बताइएको छ ।
घटना लद्दाखको राजधानी लेहबाट १३५ किलोमिटर पूर्वमा रहेको न्योमा क्षेत्रको चानताङ गाउँमा अघिल्लो साता भएको हो ।
द टाइम्स अफ इन्डियाले यस विषयमा थप कुराकानी गर्नका लागि इन्डो टिबेटन बोर्डर पुलिसका अधिकृतहरूसँग सम्पर्क गरेको भए पनि उनीहरूले कुरा गर्न नमानेको बताइएको छ ।
गाउँलेहरूले तयार पारेको भिडियोमा देखिएअनुसार, दुई गाडीमा भरिभराउ चिनियाँ सैनिकहरूको समूह भारतीय क्षेत्रमा प्रवेश गरेको थियो ।
उनीहरूले सैन्य पोशाक नलगाएको र स्थानीय गोठालाहरूलाई आफ्नो पशु त्यहाँ नचराउन भनेको समाचारमा उल्लेख गरिएको छ । तर स्थानीयहरूले विरोध गरेपछि उनीहरू फर्किएका थिए ।
