१६ असार २०८३, मंगलबार
हिउँदयाम शुरू भएसँगै हुम्लामा रहेका तातोपानीका कुण्डहरूमा नुहाउनका लागि स्थानीयको घुइँचो लाग्ने गरेको छ ।
खार्पुनाथ गाउँपालिकाको खार्पुमा रहेको तातोपानी कुण्डमा यतिबेला नुहाउने र कुण्डमा बस्नेहरूको संख्यामा वृद्धि भएको छ ।
खार्पु तातोपानी कुण्डमा दैनिक ५ देखि १० जनासम्म नुहाउन तथा तातोपानीको बाफ लिन आउने गरेको स्थानीय सम्झना शाहीले बताइन् ।
कर्णाली नदी नजिक रहेका तातोपानीका कुण्डहरूमा महिला, वृद्धवृद्धा र बाथ रोगका बिरामीहरू बस्ने गरेका छन् । तातोपानी कुण्डमा नुहाउँदा बाथ तथा छालासम्बन्धी रोगहरूको उपचार हुने मान्यताले गर्दा हुम्लाका टाढाटाढा गाउँबाट पनि मानिसहरू आउने गरेका शाहीले बताइन् ।
तातोपानी कुण्डमा सरसफाइ गर्न पनि सहज हुने र शरीरलाई समेत फाइदा हुने भएपछि तातोपानी कुण्ड प्रयोग गर्नेको संख्यामा वृद्धि भएको उनको भनाइ छ ।
खार्पुमा रहेको तातोपानी कुण्डमा नुहाउन तथा बाफ लिन राहदेव फुचा, दुर्पा, ठेहे ताक्ला लगायतका गाउँबाट मानिस आउने गरेको अर्का स्थानीय धिरु भण्डारीले बताए । हुम्लामा चंखेलीको दर्बी, सर्केगाडको उनापानी, खार्पुनाथको खार्पु र नाम्खाको केर्मीमा तातोपानीको कुण्ड रहेका छन् ।
कर्णाली नदीको छेउबाट निस्कने तातोपानी र कुण्डमा नुहाउँदा, बाफ लिँदा, शरीर तातोपानीको कुण्डमा सेकाउँदा हल्का हुने, बाथ रोग निको हने, शरीर मसाज हुने, कुण्डको पानी पिउँदा पेट सफा हुने र छालासम्बन्धी सबै रोग निको हुने भएकाले स्थानीयहरू १ हप्तादेखि १० दिनसम्म तातोपानीको कुण्डमा बस्ने गर्दछन् ।
