०४ असार २०८३, बिहीबार
नेकपा अध्यक्ष पुष्पकमल दाहाल ‘प्रचण्ड’ले ‘आई एम द स्टेट’ (म नै राज्य हुँ) भन्ने प्रधानमन्त्री एवं पार्टी अध्यक्ष केपी शर्मा ओलीको प्रवृत्तिका कारण पार्टी चोइटिने अवस्था आएको आरोप लगाएका छन् ।
विघटित प्रतिनिधि सभाका आफूपक्षीय सांसदहरूको संसदीय दलको बैठकलाई बुधवार बानेश्वरमा सम्बोधन गर्दै प्रचण्डले १० वर्ष संघर्ष गरेर प्राप्त उपलब्धिको अपहरण भएको समेत बताए ।
‘ओलीको कदम आश्चर्यजनक हो । १० वर्ष संघर्ष गरेर प्राप्त गरेको उपलब्धिको अपहरण भएको छ,’ प्रचण्डले भने, ‘चूनौतीपूर्ण घडीमा पनि जनताको अपेक्षा पूरा गर्न सकिएन । जनताले ठूलो पार्टी बनाउँदा पनि ‘आई एम द स्टेट’ भन्ने ओलीको प्रवृत्तिले पार्टी चोइटिने भयो ।’
प्रचण्डले संसद् नमरेको भन्दै कानूनी लडाईं, सडक संघर्ष र लोकतान्त्रिक दलहरूसँग संवादको माध्यमबाट नयाँ परिस्थिति बनाउने र अघि बढ्ने बताए ।
‘हामी जीवितै छौं भन्ने आत्मविश्वासका साथ अघि बढ्नुस्,’ विघटित प्रतिनिधि सभाका सांसदहरूलाई निर्देशन दिँदै प्रचण्डले भने ।
‘पार्टी र संसदीय दल दुवैमा हामी अगाडि छौं । हामीलाई मर्यो भने पनि हामी बाँचिरहेका छौं । को मर्यो जनताले थाहा पाइसक्नुभएको छ । देशबाहिर पनि निकै ठूलो चासोका साथ हेरिएको छ र ओलीको कदमलाई विरोध गरिएको छ,’ प्रचण्डले भने ।
सोही बैठकले प्रचण्डलाई पार्टी संसदीय दलको नेतामा चयन गरेको छ ।
बैठकमा राष्ट्रिय सभाका २४ र विघटित प्रतिनिधि सभाका ९३ गरी १ सय १७ जना सांसदको उपस्थिति रहेको दाबी प्रचण्ड–नेपाल पक्षले गरेको छ ।
