गृहमन्त्री एवं नेकपा सचिवालय सदस्य रामबहादुर थापाले प्रतिनिधि सभा पुनर्गठन हुन्छ भन्नु पश्चगामी सोच र स्याल हुइयाँ मात्र भएको टिप्पणी गरेका छन् । उनले प्रतिनिधि सभा विघटनलाई अग्रगामी र क्रान्तिकारी कदम भएको दावी गरे ।

प्रधानमन्त्री एवं नेकपा अध्यक्ष केपी शर्मा ओली पक्षीय केन्द्रीय सदस्यहरुको बैठकलाई बिहीवार बालुवाटारमा सम्वोधन गर्दै गृहमन्त्री थापाले निर्वाचन मात्र अग्रगामी कदम भएको बताएका हुन् ।
‘संसद विघटन अग्रगामी र क्रान्तिकारी कदम हो । विघटित प्रतिनिधि सभा पुनस्र्थापना हुन्छ भन्नु पश्चगामी र स्याल हुइयाँ मात्र हो । हामीले निर्वाचनबाट दुई तिहाइ बहुमत ल्याउनु पर्छ’ राष्ट्रिय सभा सदस्य समेत रहेका थापाले बालुवाटार भेलामा भने ।

पार्टीमा गुटबन्दी र अराजकता पुष्पकमल दाहाल प्रचण्ड र माधवकुमार नेपालहरुले जन्माएको दावी थापाले गरे । उनले आफूले सोच बिचार गरेरै नेकपाको मूल नेतृत्वलाई साथ दिएको बताए । साथै नेकपाको मूल नेतृत्व केपी ओली नै भएको बताए ।

लामो समयको मौनता तोड्दै थापा ओली क्याम्पमा गएका हुन् । ओली समूहमा सहभागि हुने थापा पूर्व माओवादी खेमाका प्रभावशाली नेता हुन् । बादलले ओली रोजेपछि उनका राजनीतिक सल्लाहकार सूर्य सुवेदीले बादलको साथ छाडेका छन् ।

बादलका राजनीतिक सल्लाहकारबाट अलग भएका सुवेदी प्रचण्ड नेपाल पक्षको बैठकमा सहभागि भएका छन् । प्रचण्डनिकट मानिने कर्णाल प्रदेशका आन्तरिक मामिला मन्त्री नरेश भण्डारी पनि प्रचण्ड कित्तामा फर्किएका छन् ।

ओली पक्षीय केन्द्रीय कमिटी बैठकले पार्टी हित विपरित काम गरेको भन्दै प्रचण्डलाई कार्यकारी अध्यक्षबाट हटाएको छ।