०१ असार २०८३, सोमबार
म्याग्दीका एक व्यक्तिलाई कलेजो प्रत्यारोपणका लागि करीब १४ लाख रुपैयाँ आर्थिक सहयोग जुटेको छ ।
कलेजोको समस्याले थलिएका धवलागिरि गाउँपालिका–७ धारापानीका ५३ वर्षीय खड्कबहादुर थापाको उपचारका लागि सोमवार १३ लाख ९६ हजार ३९६ रुपैयाँ सहयोग गरिएको हो ।
काठमाडौं–धारापानी सम्पर्क समाजले स्वदेश तथा विदेशमा रहेकाहरूबाट सो रकम संकलन गरेर थापाको कलेजो प्रत्यारोपणका लागि सहयोग गरेको जनाएको छ । अभियानको नेतृत्व गर्नुभएका समाजका अध्यक्ष क्याप्टेन भरतबहादुर थापाले संकलित रकम थापालाई उपलब्ध गराइएको जानकारी दिए ।
‘नामावली र ठेगाना सहितको विवरण सोमवार सार्वजनिक गर्दै समाजले सहयोगदातालाई धन्यवाद ज्ञापन गरेको छ,’ उनले भने, ‘सहयोग जुटाउन फलियागाउँ–काठमाडौं समाजले पनि सघाएको थियो ।’
नवलपुरको बेल्डीयाबाट केशरबहादुर थापा र डम्मरबहादुर थापाको संयोजकत्वमा ६८ हजार ५०५ रुपैयाँ, कोरियाबाट कृष्णबहादुर थापाको संयोजकत्वमा ६९ हजार, जापानबाट काजी थापा, जीतबहादुर खत्री र अमृत थापाको पहलमा १ लाख ८८ हजार १९०, अस्टे«लियाबाट किसान पुन मगर, चक्रबहादुर थापा, भूपेन्द्र थापा, सन्तोष थापा र चन्द्रप्रकाश थापाको अगुवाइमा १ लाख ८७ हजार संकलन भएको थियो ।
बेनीमा बस्दै आएका ५३ वर्षीय थापाको उपचारको क्रममा अर्थिक अभावपछि परिवारले सहयोगको अपिल गरेको थियो । ओमकुमारी शान्ति कोषले पनि थापाको उपचारका लागि सहयोग संकलन अभियान सञ्चालन गरेको थियो । बेनीको न्यूरोडका व्यवसायी र थापाका आफन्त एवं धारापानीका वासिन्दाले पनि सहयोग गरेका थिए ।
निर्माणसम्बन्धी काम गरेर जीविकोपार्जन गर्दै आएका थापाको हाल भारतको मुम्बईस्थित नायर अस्पतालमा उपचार भइरहेको छ । थापाकी पत्नी यामुले आवश्यक आर्थिक स्रोत जुटेपछि शल्यक्रिया गरेर कलेजो प्रत्यारोपणको तयारी भएको बताए ।
