नेपाली कांग्रेसका केन्द्रीय सदस्य तथा पूर्वमन्त्री बालकृष्ण खाँणले सरकार कामचलाउ भइसकेको बताएका छन् ।

नेपाल प्रेस युनियन रुपन्देहीले मंगलवार बुटवलमा गरेका पत्रकार भेटघाट कार्यक्रममा बोल्दै नेता खाँणले कामचलाउ सरकारले दीर्घकालीन महत्त्वका कुनै पनि निर्णय गर्न नपाउने बताए । 

‘कामचलाउ सरकारले दीर्घकालीन महत्त्वका कुनै पनि निर्णय गर्न पाउँदैन । यदि गर्‍यो भने त्यस्तो निर्णय कांग्रेसलाई स्वीकार्य हुने छैन,’ नेता खाँणले भने । 

पूर्व रक्षामन्त्री समेत रहेका नेता खाँणले राष्ट्रपति कार्यालयले प्रधानमन्त्री कार्यालयको हल्काराको रूपमा काम गरेको टिप्पणी पनि गरे । संविधानको बर्खिलाप हुने गरी प्रधानमन्त्री ओलीले व्यक्तिगत स्वार्थमा गरेका निर्णय तथा सिफारिसको मसी सुक्न नपाउँदै राष्ट्रपतिले स्ट्याम्प लगाइदिएको भन्दै उनले राष्ट्रपति कार्यालयलाई हल्काराको संज्ञा दिए ।

‘राष्ट्रपतिसँग विषय विज्ञ सल्लाहकारको टीम छ तर कसैसँग सल्लाह गर्नुहुन्न । ओलीले गर्ने संविधान विपरीतका अध्यादेश, सिफारिसको मसी सुक्न नपाउँदै स्ट्याम्प लगाएर पठाइदिनुहुन्छ,’ नेता खाँणले भने  ।  

संविधानका कुनै पनि धाराले बहुमतको प्रधानमन्त्रीलाई यथास्थितिमा संसद विघटन गर्ने अधिकार नदिएको भन्दै उनले राष्ट्रपति र प्रधानमन्त्री मिलेर मुलुकलाई एकदलीय सर्वसत्तावादतर्फ लैजान संसद विघटनको कदम चालेको आरोप  लगाए । सरकारले गरेका भ्रष्टाचार लुकाउन पनि संसद विघटन गरेको बताए ।

निर्वाचनको मिति तोकेर संसद विघटन गरिए पनि प्रधानमन्त्री ओलीको मानसिकता वैशाखमा चुनाव गर्नु नरहेको भन्दै उनले कोरोनाको बहानामा संकटकाल लगाएर निर्वाचन सार्न सक्ने खतरा औंल्याए ।

संविधान र लोकतन्त्रको रक्षा गर्दै मुलुकलाई सही दिशा दिन नेपाली कांग्रेस सडकमा निस्किएको भन्दै उनले देश र जनताका लागि जस्तोसुकै बलिदान दिन कांग्रेस तयार रहेको बताए ।

पछिल्लो राजनीतिक अवस्था र प्रदेश सरकारको फेरबदलका सम्बन्धमा उनले असंवैधानिक कदमको विरोधमा रहेकाहरूसँगको सहकार्य पहिलो रोजाइ हुने बताए । नेकपामा प्रचण्ड–नेपाल पक्षीय नेताहरू विरोधमा रहेका छन् । कांग्रेसलाई सत्तामा जाने हतार नभए पनि लोकतान्त्रिक पार्टी भएकाले ढोका थुनेर बस्न नमिल्ने भन्दै उनले परिस्थिति अनुरूपको सहकार्य हुनसक्नेतर्फ पनि संकेत गरे ।

लोकतन्त्र र संविधानको रक्षा गर्दै ट्रयाक बाहिर गएकाहरूलाई मूलधारमा ल्याउने दायित्व कांग्रेसको भएको र त्यसलाई पूरा गर्ने बताए ।