२८ जेठ २०८३, बिहीबार
स्टिलका सामग्रीहरू उत्पादन गर्ने पोदरेज स्टिल एन्ड आइरन इन्डस्ट्रिजले त्रिवि शिक्षण अस्पताल (टिचिङ हस्पिटल)लाई बेड हस्तान्तरण गरेको छ ।
हेल्थ इक्युपमेन्टअन्तर्गत उद्योग आफैंले निर्माण गरेको बेड अस्पतालका कार्यकारी निर्देशक डा. दिनेश काफ्लेको उपस्थितिमा एक कार्यक्रमका बीच शुक्रबार हस्तान्तरण गरिएको हो ।
समयको माग अनुसार मेडिकल प्रयोजनका लागि उद्योगले हेल्थ इक्युपमेन्ट निर्माण शुरू गरेको जानकारी दिँदै पोदरेजका प्रबन्ध निर्देशक प्रमोद गौतमले सामाजिक उत्तरदायित्व बहन गर्दै टिचिङ अस्पताललाई बेड हस्तान्तरण गरिएको बताए ।
उनले भने– ‘हामिले विशुद्ध नेपाली उद्योगको रूपमा स्थापना गरी आफ्नै फ्याक्ट्रिबाट हेल्थ इक्युपमेन्ट उत्पादन गर्न सफल भएका छौं र अस्पताललाई स्वदेशमै निर्मित बेड हस्तान्तरण गर्न पाउँदा खुशी लागेको छ ।’
अस्पतालका कार्यकारी निर्देशक डा. काफ्लेले पोदरेजले अस्पतालका लागि बेड उपलब्ध गराएकोमा खुशी व्यक्त गर्दै उद्योगको सफलताको कामना गरे ।
डा. काफ्लेले आगामी दिनमा अस्पतालको आवश्यकताअनुसार स्वदेशी उत्पादनलाई प्राथमिकता दिँदै पोदरेजसँग बेडलगायतका सामग्रीहरू खरिदमा सहकार्य गरिने बताए ।
उनले भने– ‘हाम्रो प्राथमिकता पनि स्वदेशमै उत्पादन गरिएका सामग्री प्रयोग गरौं भन्ने हो, यदि पोदरेजले हामीले भनेजस्तो सामग्री उत्पादन र वितरण गर्न सक्ने हो भने सहकार्य गर्न सकिनेछ ।’
पारिवारिक उद्योगको रूपमा सन् १९७२ मा स्थापना भएको पोदरेज स्टिल एण्ड आइरन इन्डस्ट्रिजले ४८ बर्षको अवधिमा थुप्रै सामाजिक योगदान गरिसकेको छ ।
यस अवधिमा उद्योगले नेपाल शाही संगठन नामक संस्थामार्फत देशका विभिन्न ठाउँमा विद्यालय बनाउन, दुरदराजका बस्तीमा खानेपानीको व्यवस्थापन गर्न सहयोग पुर्याउँदै आएको छ ।
नेपालमा स्टिलका सामग्री उत्पादन गर्ने पोदरेज सबैभन्दा ठूलो स्वदेशी उद्योग हो ।
पहिला घरायसी प्रयोजनको लागि दराज लगायतका सामग्री उत्पादन हुँदै आएकोमा हाल अफिसियल, हेभी सेक्युरिटी इक्युपमेन्ट(जसमाः बैंक लकर, फायर प्रुभ सेभ, फायर प्रुफ फायलिङ क्याबिनेट लगायत) र सिटिङ सिस्टमका सामग्रीहरू उत्पादन तथा बिक्री वितरण गर्दै आएको प्रबन्ध निर्देशक गौतमले जानकारी दिए । उनले पोदरेजका सामान देशैभर सहजै उपलब्ध रहेको बताए ।
उपत्यकामा ८ वटा विक्रि केन्द्र रहेको पोदरेजले विराटनगर र पोखरामा पनि आफ्नै बिक्री केन्द्र सञ्चालन गरिरहेको छ भने छिट्टै नै चितवन नारायणगढमा पनि विक्रि केन्द्र संचालनमा आउने गौतमले जानकारी दिए ।
