१३ असार २०८३, शनिबार
नेकपा स्थायी कमिटी सदस्य एवं लुम्बिनी प्रदेश सरकारका मुख्यमन्त्री शंकर पोखरेलले पुष्पकमल दाहाल ‘प्रचण्ड’–माधवकुमार नेपाल पक्षसँग पार्टी विभाजनका लागि ४० प्रतिशत पनि बहुमत नभएको दाबी गरेका छन् । केपी ओली उभिएको पार्टी नै आधिकारिक हुने उनको भनाइ छ ।
रुपन्देही जिल्लास्तरीय अगुवा कार्यकर्ता भेलालाई आइतवार सम्बोधन गर्दै पोखरेलले प्रथम अध्यक्ष र महासचिव भएको पार्टी नै आधिकारिक भएको दाबी गरेका हुन् ।
‘पार्टीको संस्थापन को हो ? जुन पार्टीमा प्रथम अध्यक्ष र महासचिव छ, त्यही नै आधिकारिक हो । द्वितीय अध्यक्ष रहेको र महासचिव नभएको पार्टी कहीँ आधिकारिक हुन्छ ?’ पोखरेलले भने ।
केन्द्रीय कमिटीका सदस्यहरूको हैसियत मनोनित भएकाले त्यसैलाई देखाएर बहुमत–अल्पमत भन्नु उचित नभएको उनको तर्क छ ।
नेकपा एकताका बेला पूर्व एमालेको मनोनयन ओली र पूर्व माओवादी पक्षको मनोनयन प्रचण्डले गरेको उनले बताए ।
‘निर्णयको प्रमाणीकरण गर्ने महासचिव हामीसँग हुनुहुन्छ । प्रथम अध्यक्षले पार्टी रक्षाका लागि केन्द्रीय सदस्य ११ सय ९९ बनाउनुभयो । खासमा भन्ने हो भने प्रचण्ड–माधवले पार्टी फोड्न पनि सक्नुहुन्न । त्यसअर्थमा ओली जहाँ उभिनुभएको छ, त्यही आधिकारीक पार्टी हो ।’
