नेपाल कम्युनिस्ट पार्टी (नेकपा) अध्यक्ष पुष्पकमल दाहाल ‘प्रचण्ड’ पत्नी सीता दाहाललाई उपचारका लागि भारतको मुम्बई लगिएको छ ।

सीताको उपचार मुम्बईस्थित न्युरोजेन ब्रेन यान्ड स्पाइन इन्स्टिच्युटमा हुँदैछ ।

सीतालाई सोमवार नै भर्ना गर्ने तयारी रहेको पारिवारिक स्रोतले जानकारी दियो । केही दिन ललितपुरको मेडिसिटी अस्पतालमा उपचार गर्दा पनि सुधार नदेखिएपछि उनलाई मुम्बई लगिएको हो । विमानस्थलमा सीतालाई ह्वील चेयरमा राखेर विमानसम्म लगिएको थियो । 

शिथिल शरीरका कारण विमानस्थलको विशिष्ट कक्षमा रहेको सोफामा सीता बस्न सकिनन् । उनी छोरी रेणु दाहालको काखमा सुतेको तस्वीर नेकपा नेत्री अमृता थापाले फेसबूकमा राखेकी छन् ।

सीताको उपचारका लागि नेकपा अध्यक्ष प्रचण्ड पनि मुम्बई गएका छन् । प्रचण्ड केही दिन मुम्बईमै रहने पारिवारिक स्रोतले जानकारी दियो ।

प्रचण्डपत्नी दाहाल लामो समयदेखि अस्वस्थ रहँदै आएकी छन् । पार्किन्सनको बिरामी रहेकी सीता सुगर र उच्च रक्तचापबाट पनि पीडित छिन् ।