बलिउड २०२१ : हिट कलाकारका एक से एक फिल्म प्रदर्शनको तयारीमा

रामजी ज्ञवाली
रामजी ज्ञवाली

ज्ञवाली लोकान्तरका कला र मनोरञ्जन संवाददाता हुन् ।

वर्ष २०२१ फाप्यो भने बलिउडले कोरोना महामारीका कारण गुमाएको धेरै नोक्सानीको क्षतिपूर्ति गर्ने देखिएको छ । 

त्यति मात्रै होइन, २०२१ ले चलचित्र निर्देशक, निर्माता, निर्माण कम्पनी र कलाकारहरूमा एक खालको ऊर्जा दिने संकेत पाइएको छ । यो वर्ष बलिउड चम्कियो भने त्यसले नेपाली चलचित्र उद्योगलाई समेत चलायमान बनाउन ठूलो मद्दत पुग्नेछ । 


Advertisement

बलिउड पुरानै लयमा फर्किनु भनेको कोरोना महामारीअघि जसरी दर्शक हलमा थामिनसक्नु तरिकाले भरिभराउ हुन्थे, त्यस्तै हुनु हो । तर बलिउड पण्डितहरूले भने केही चलचित्रको प्रदर्शनपछि हलमा दर्शकको उपस्थिति देखेका आधारमा मात्रै बलिउडको यस वर्षको भविष्यवाणी गर्न सक्ने प्रतिक्रिया दिएका छन् ।

सन् २०२० बलिउडका लागि असाध्यै निराशाजनक रह्यो । दर्शकले हलमै हेर्न मज्जा आउने खालका चलचित्र छुटाउनुपरेको थियो । अर्बौं रकम चलचित्र उद्योगमा फ्रिज भएर बसेको छ । 

डिजिटल प्लेटफर्मबाट प्रदर्शन भएका कतिपय चलचित्र दर्शकका लागि सहज पहुँचमा रहेनन् । थोरै पैसामा टिकट काटेर ठूलो पर्दामा चलचित्र हेर्ने बानी पारेका बलिउड फ्यानहरूका लागि २०२१ भने असाध्यै शुभ हुने लक्षण देखिन्छ ।

अघिल्लो वर्ष प्रदर्शन हुन नसकेका केही प्रतीक्षित चलचित्रसँगै अहिले धमाधम छायांकन भइरहेका चलचित्रको लेखाजोखा गर्ने हो भने यस वर्षभरि दर्शकले एक से एक उम्दा चलचित्र हेर्न सक्नेछन् । बलिउडका सबैजसो नामी कलाकारका चलचित्र हलमा आउनेछन् । 

तर शाहरूख खान अभिनित कुनै पनि चलचित्र प्रदर्शनमा आउने देखिएको छैन । उनी २०२२ मा प्रदर्शन हुने चलचित्र ‘पठान’को शूटिङमा व्यस्त छन् ।

यो वर्ष सर्वाधिक प्रतीक्षा गरिएको चलचित्र हो, केजीएफ च्याप्टर २ । यो बाहुबाली पछि सबैभन्दा अपेक्षा गरिएको चलचित्र बनेको छ । केहि दिनअघि सार्वजनिक यस चलचित्रको टिजरले दर्शकका लागि झन् उत्साहित बनाएको छ । टिजर सार्वजनिक भएको ३ दिनमा १३ करोड नजिक भ्युज छ ।

यसको च्याप्टर १ ले पनि निकै राम्र्रो कमाइ गरेको थियो, दर्शकले यो चलचित्रलाई निकै रुचाएका थिए । च्याप्टर २ मा बलिउडमा ‘सञ्जू बाबा’ को उपनाम पाएका अभिनेता सञ्जय दत्तले खलनायकको भूमिका निर्वाह गरेका छन् । 

सञ्जय केही वर्ष जेल जीवन बिताएर फेरि चलचित्र उद्योगमा सक्रिय छन् । उनी आफैंका लागि यो चलचित्र सबैभन्दा धेरै चुनौती बोकेर उभिएको छ किनभने यो चलचित्र सुपरहिट भएको खण्डमा सञ्जयका लागि अब बलिउडको बाटो सुखद हुने अपेक्षा छ ।

यदि भनेजस्तै भयो भने सन् २०२१ मा प्रदर्शन हुने प्रतीक्षित ३ दर्जन चलचित्रले निराश बलिउडको मुहार फेर्नेछन् । दर्शकले त्यसैअनुसार हलमा आए भने सन् २०२१ ले पुनः बलिउडलाई नयाँ उचाइमा पुर्‍याउनेछ ।

सलमान खानका ३ वटा चलचित्र प्रदर्शन हुनेवाला छन् । सन् २०२० मा प्रदर्शन हुने भनिएको चलचित्र ‘राधे’ हल जानबाट रोकियो, कोरोनाका कारण ।

यो चलचित्र आगामी ईदमा प्रदर्शन गर्नेगरी सलमानको टिमले काम गरिरहेको भारतीय मिडियाको भनाइ छ । सलमान हरेक वर्षको ईदमा आफ्नो एउटा चलचित्र प्रदर्शन गर्ने अभिनेता हुन् । 
 

राधेलाई सलमानका प्रिय निर्देशक प्रभु देवाले निर्देशन गरेका हुन् । यस चलचित्रमा दर्शकले सलमानसँगै रणदीप हुड्डा र दिशा पाटनीलाई पनि देख्न पाउनेछन् । 

यस चलचित्रको छायांकनका बेला सलमानले सार्वजनिक गरेको एक सानो दृश्यले दर्शकको ध्यान तानेको थियो । 

सलमान अभिनित चलचित्र ‘अन्तिम’ र ‘कभी ईद, कभी दिवाली’ पनि सन् २०२१ मै प्रदर्शन हुने खबर आएको छ । यदि यी दुई चलचित्र पनि प्रदर्शन भएको खण्डमा सन् २०२१ सलमान खान फ्यानले ३ वटा चलचित्र हेर्न पाउनेछन् ।

यदि लगातार प्रदर्शन भएको खण्डमा अभिनेता अक्षयकुमार अभिनित ६ वटा चलचित्र दर्शकले हेर्न पाउनेछन् । अक्षयद्वारा अभिनित र प्रदर्शन भइसकेको चलचित्र ‘लक्ष्मी’ डिजिटल प्लेटफर्ममार्फत प्रदर्शन नभएको खण्डमा यो वर्ष ७ वटा चलचित्र हलमा पुग्ने सम्भावना थियो । 

त्यसो त सन् २०२१ मै अक्षयका सबै चलचित्र प्रदर्शन गर्ने पक्का भइसकेको छैन । तथापि बलिउड पण्डितहरूका कुरालाई आधार मान्ने हो भने अक्षयका कम्तीमा ५ वटा चलचित्र हलमा प्रदर्शन हुन सक्नेछन् । 

उनकै अभिनय रहेका प्रतीक्षित चलचित्र सूर्यवंशी, रक्षाबन्धन, बेलबटम, पृथ्वीराज, अतरंगी र बच्चन पान्डेय हुन् । यी चलचित्रहरूमध्ये केहीको पोस्टप्रोडक्सनको काम बाँकी रहेको बताइएको छ ।

यो वर्ष बलिउडका महानायक अमिताभ बच्चन अभिनित चलचित्र ‘चेहरे’ प्रदर्शन हुने भएको छ । अघिल्लो वर्ष प्रदर्शनका लागि तयार यो चलचित्रको कोरोनाका कारण प्रदर्शन मिति सारिएको थियो ।  चेहरे थ्रिलर चलचित्र हो । 
रुमी जाफरीको निर्देशनमा बनेको यो चलचित्रलाई आनन्द पण्डित मोशन पिक्चर्स र सरस्वती इन्टरटेनमेन्टको ब्यानरमा निर्माण गरिएको हो ।

चलचित्रमा अमिताभ बच्चनबाहेक इमरान हाशमी, क्रिस्टल डिसूजा, रिया चक्रवर्ती, सिद्धान्त कपूर र अन्नु कपूर लगायतका कलाकारलाई पनि देख्न सकिनेछ । अमिताभ बच्चन एक वकिलको भूमिकामा देखिनेछन् भने हाशमी एक व्यवसायीको रूपमा देखिनेछन् ।

रेकर्ड ब्रेकर अभिनेता अर्थात मिस्टर पर्फेक्सनिस्ट आमिर खानको सन् २०२१ मा एउटा चलचित्र प्रदर्शन हुनेछ । आमिरका फ्यानहरूले लामै समय भयो, उनका चलचित्र हेर्न नपाएको । सोही कारण पनि उनको चलचित्र ‘लाल सिंह चड्डा’ यसै वर्ष प्रदर्शन हुनेछ । करिना कपूर, विजय सेठी, मोना सिंह लगायतका कलाकारको अभिनय रहेको यो चलचित्रलाई  सेक्रेट  सुपरस्टार फेम निर्देशकले निर्माण गरेका हुन् । यो चलचित्र बलिउडको अर्को प्रतीक्षित चलचित्र हो ।

चलचित्र ‘८३’ पनि यसै वर्ष प्रदर्शन हुनेछ । रणवीर सिंहको लोकप्रियता पछिल्लो ५ वर्षमै ह्वात्तै बढेको थियो, उनकै अभिनय रहेको चलचित्र हो यो । छोटो समयमा सर्वाधिक फ्यान फलोइङ कमाएका यी अभिनेताको यो चलचित्र अर्को प्रतीक्षित चलचित्रको रूपमा रहेको छ । 

यसमा रियल कपल दीपिका पादुकोण पनि सँगै देखिने भएकाले यसको छुट्टै महत्त्व छ ।

बिहेपछि उनीहरूले सँगै काम गरेको चलचित्र भएकाले पनि यो चलचित्र निकै प्रतीक्षित बनेको हो । त्यस्तै रणवीरले काम गरेका अरू दुई चलचित्र ‘जोरदार’ र ‘सर्कस’ पनि यसै वर्ष प्रदर्शन गर्नेगरी सम्बन्धित चलचित्र टिमले तयारी थालिसकेको बीबीसी हिन्दीले जनाएको छ । 

रणवीरको चलचित्र ‘८३’ सन् १९८३ मा आयोजित क्रिकेट वर्ल्डकपमा भारतले जीत हासिल गरेको विषयमा आधारित छ । रणवीर यो चलचित्रमा कप्तान कपिल देवको भूमिकामा देखिनेछन् । भारतीय मिडियाको विश्लेषण हेर्ने हो भने रणवीरका अरू दुई चलचित्रको तुलनामा यस चलचित्रको प्रतीक्षा धेरै गरिएको छ । 

रणवीर स्वयं समेत यो चलचित्रबाट धेरै आशावादी छन् । त्यसो त  रोहित सेट्टीको निर्देशनमा बनेको चलचित्र सर्कस र यशराज फिल्म्सको निर्माणमा बनिरहेको चलचित्र जयेशभाइ जोरदार पनि बलिउडका लागि प्रतीक्षित चलचित्रको रूपमा रहेका छन् ।

यस्तै अभिनेता अजय देवगनका फ्यानले २०२१ मा तीनवटा चलचित्र हेर्न पाउने सम्भावना धेरै छ । तर उनको एउटा चलचित्र ‘भुज द प्राइड अफ इन्डिया’ ओटीटी प्लेटफर्मबाट प्रदर्शन हुने भएको छ । 

त्यस्तै अनिल शर्माको निर्देशनमा बनेको चलचित्र ‘मैदान’ र एसएस राजामौलीको निर्देशनमा बनेको चलचित्र ‘आरआरआर’ भने हलमा प्रदर्शन हुनेछन् ।

आलिया र रणवीर कपूर अभिनित पहिलो चलचित्र ‘ब्रह्मशास्त्र’ सन् २०२१ मा प्रदर्शन हुने भएको छ । धर्मा प्रोडक्सनको निर्माणमा बनेको यो चलचित्रलाई अयान मुखर्जीले निर्देशन गरेका हुन् । 

आलिया र रणवीर रियल जोडी हुन्, यस चलचित्रमा उनीहरूको भूमिका कस्तो छ, चलचित्र प्रदर्शन भएपछि पक्कै थाहा हुनेछ । 

तर केही समयअघि सार्वजनिक उनीहरूका तस्वीर हेर्दा यस चलचित्रमा पनि उनीहरू प्रेमिल जोडीका रूपमा देखिनेछन् । त्यस्तै शमशेरा र लव रन्जन निर्देशित एक रोमान्टिक कमेडी पनि रणविर अभिनित चलचित्र हुन् । 
यी चलचित्र पनि यसै वर्ष प्रदर्शन हुने भएका छन् । 

पटक पटक विवादमा फसेको आलिया अभिनित चलचित्र ‘गंगुबाई काठियावाडी’ पनि यसै वर्ष प्रदर्शन हुने पक्का छ ।

अभिनेता टाइगर श्रोफ अभिनित तीनवटा चलचित्र यस वर्ष प्रदर्शन हुने सम्भावना छ । हिरोपन्ती २, बागी ४ र गणपतमार्फत टाइगरलाई हलमा देख्न पाइनेछ ।

अभिनेता फरहान अख्तरको चलचित्र ‘तुफान’ले पनि यसै वर्ष रिलिज डेट बुक गर्ने सम्भावना धेरै छ । फरहान अख्तर ८ वर्षपछि दर्शकसामु आउन थालेका हुन् । फरहानका आफ्नै किसिमका फ्यानफलोइङ रहेकाले पनि यो चलचित्र हलमा राम्रै चल्ने अपेक्षा गरिएको छ ।

त्यस्तै, पछिल्लो पुस्ताका लोकप्रिय अभिनेता  कार्तिक अभिनीत भुलभुलैया २, दोस्तानाको सिक्वेल र धमाका यसै वर्ष प्रदर्शन हुने भएका छन् ।

कटरिना कैफ अभिनित चलचित्र ‘फोन भूत’ पनि सन् २०२१ मा प्रदर्शन हुने सम्भावना छ । अभिनेता सिद्धान्त चतुर्वेदीको नाम नखुलाइएको एक चलचित्र र फोन भूतमार्फत दर्शकसामु आउनेछन् ।

चलचित्र ‘तेजस’ सन् २०२१ मै प्रदर्शन हुनेछ । यो चलचित्रको सम्पादनको काम सकिएको छ । यो चलचित्रमा कंगना रनावतको अभिनय रहेको छ । 

सुशान्त सिंह राजपूतको आत्महत्याको विषयमा सबैभन्दा धेरै बोलेकी कंगनाले त्यसपछि बलिउडमा ड्रग्सको विषयमा निकै मुख खोलेकी थिइन् । 
 

शिवसेनाले मुम्बई प्रवेशमा रोक लगाएपछि भारतको केन्द्रीय सरकारले उनलाई अंग्रेजीको अक्षर वाई आकारमा सुरक्षा सुविधा दिएर अहिले उनी आफ्ना कामहरूमा लागिरहेकी छन् । तेजस चलचित्रमा उनी लडाकूको रुपमा देखिनेछिन् ।

अभिनेत्री दीपिका पादुकोण शकुन बत्राको नयाँ चलचित्रमार्फत दर्शकसामु यसै वर्ष देखिने पक्का छ । यो चलचित्रको नाम भने अहिलेसम्म घोषणा गरिएको छैन । त्यस्तै उनी अभिनित ‘८३’ पनि यसै वर्ष प्रदर्शन हुनेछ ।

चलचित्र ‘बधाई दो’ यसै वर्ष प्रदर्शन हुनेछ । यो चलचित्रमा अभिनेता राजकुमार रावको मुख्य भूमिका छ ।

अभिनेता विक्की कौशल अभिनित ‘सरदार उधम सिंह’ पनि यस वर्ष प्रदर्शन हुँदैछ ।

सुन्दर अभिनेत्री तापसी पन्नु अभिनीत ‘रश्मि रकेट’ ले पनि यसै वर्ष प्रदर्शनका लागि तयारी गरिरहेको बुझिएको छ । उक्त चलचित्रको यतिबेला सम्पादनका केही कामहरू भइरहेका छन् ।

अभिनेता आयुषमान खुराना अभिनीत ‘अनेक’ र ‘चन्डीगढ करे आशिकी’ पनि यस वर्ष प्रदर्शन हुने भएका छन् । ड्रिम गर्ल, बाला, बधाई हो लगायतका हिट चलचित्र दिइसकेका आयुषमानका अधिकांश चलचित्र सफल रहेकाले पनि यी चलचित्र हेर्न लायक हुनेछन् र दर्शकको भीड लाग्ने अनुमान गर्न सकिन्छ ।

रामजी ज्ञवाली
रामजी ज्ञवाली

लेखकबाट थप...

कमेन्ट गर्नुहोस्