०४ असार २०८३, बिहीबार
फोरजीमा एनसेलको बजार हिस्सा सबैभन्दा बढि रहेको पाइएको छ ।
नेपाल दूरसञ्चार प्राधिकरणले पछिल्लो पटक सार्वजनिक गरेको म्यानेजमेन्ट इन्फरमेसन सिस्टम (एमआइएस) रिपोर्टका अनुसार फोरजीमा एनसेलको बजार हिस्सा सबैभन्दा बढि देखिएको हो ।
हाल फोरजी मोबाइल ब्रोडब्याण्ड सेवा प्रयोग गर्ने उपभोक्ताको संख्या ६३ लाख पुगेको छ ।
कार्तिक महिनासम्ममा फोरजीको कुल ग्राहक संख्या ६३ लाख ३२ हजार १९४ रहेको दूरसञ्चार प्राधिकरणले जनाएको छ ।
अहिले नेपाल टेलिकम, एनसेल र स्मार्ट टेलिकमले यो सेवा दिदै आएका छन् । यो सेवा २१=१९ प्रतिशत नेपालीले प्रयोग गर्ने गरेका छन् ।
चार वर्ष अगाडि यो सेवा पहिलो पटक नेपाल टेलिकमले संचालनमा ल्याएको थियो । एनसेलले टेलिकम भन्दा पाँच महिनापछि यो सेवा संचालनमा ल्याएको थियो ।
प्राधिकरणका अनुसार एनसेलका ४० लाख ८२ हजार ५१७ ग्राहक रहेका छन् भने नेपाल टेलिकमका २० लाख ४९ हजार ९१६ ग्राहक रहेका छन् ।
त्यसैगरी स्मार्ट टेलिकमका १ लाख ९९ हजार ७६१ ग्राहक छन् । फोरजी सेवा बजारमा एनसेलको ६५ प्रतिशत, टेलिकमको ३२ र स्मार्ट टेलिकमको ३ प्रतिशत बजार हिस्सा रहेको छ ।
नेपालको कुल ब्रोडब्याण्ड सेवा चलाउने प्रयोगकर्ताको संख्यामा फोरजीको योगदान २६ प्रतिशत रहेको छ ।
सबैभन्दा बढि योगदान ५६ प्रतिशत थ्रीजी सेवाको रहेको छ भने केबल इन्टरनेट फाइबर टु द होम अर्थात एफटीटीएचको योगदान २२ प्रतिशत रहेको छ ।
नेपालमा ब्रोडब्याण्ड सेवाको कुल ग्राहक संख्या २ करोड ३९ लाख २१ हजार १८० रहेको छ ।
