०२ असार २०८३, मंगलबार
टोक्यो ओलम्पिक आयोजक कमिटीका अध्यक्ष योशिरो मोरीले महिलाप्रति आपत्तिजनक टिप्पणी गरेकोमा बिहीवार माफी मागेका छन् ।
बुधवार ओलम्पिक कमिटीको बैठकमा कमिटी बोर्डमा लैंगिक विविधता बढाउने विषयमा प्रश्न गर्दा उनले महिलाहरू ‘धेर प्यारप्यार गर्ने’ र ‘एकअर्कालाई देखिनसहने’ भनी टिप्पणी गरेका थिए ।
‘त्यो अनुपयुक्त टिप्पणी थियो । म माफी माग्छु,’ मोरीले बताए । तर आफूले पदबाट राजीनामा नदिने किनकि खेलकुद आयोजन सफल पार्ने जिम्मेवारी आफ्नो भएको उनले बताए ।
मोरीको विवादास्पद टिप्पणीलाई जापानी ओलम्पिक कमिटीका निर्देशकले तथा सामाजिक सञ्जालले आलोचना गरेका थिए । ओलम्पिक आयोजनलाई जनताले प्रतिकार गरेको अवस्थामा यस टिप्पणीले थप आघात गरेको छ ।
ओलम्पिक पार्षदहरूसँगको अन्लाइन बैठकमा मोरीले बैठकहरूमा महिलाले धेरै बोल्ने गरेको र महिलालाई बोल्नका लागि सीमित समय उपलब्ध गराउनुपर्ने बताएका थिए । बोर्डमा महिलाको संख्या बढाउने कुरा चल्दा उनले यस्तो टिप्पणी गरेका हुन् ।
ओलम्पिक कमिटीले निर्देशक बोर्डमा महिलाको संख्या ४० प्रतिशत पुर्याउन खोजेको छ । अहिले २० प्रतिशत मात्र महिला सदस्य छन् ।
‘शिक्षा मन्त्रालयले महिला निर्देशक छान्न एकदमै जोड गरिरहेको छ । तर धेरै महिला भएको बोर्डको बैठक लामो समयसम्म तन्किन्छ,’ मोरीले बताए ।
