०७ असार २०८३, आइतबार
जापानको पूर्वी भागमा शनिवार ७.३ म्याग्निच्युडको भूकम्प आएपछि त्यहाँ रहेको एक आणविक भट्टीबाट रसायन चुहिएको आशंका गरिएको छ ।
भूकम्पको केन्द्रविन्दु फुकुशिमा प्रिफेक्चर हो र पृथ्वीको सतहभन्दा ६० किलोमिटर मुनिबाट शुरू भएको हो । भूकम्पपछि विशाल क्षेत्रमा विद्युत् आपूर्ति ठप्प भएको जापानको मौसम विभागले जनाएको छ ।
भूकम्प स्थानीय समयअनुसार शनिवार राति ११ बजेर ८ मिनेट जाँदा गएको थियो । त्यसले राजधानी टोक्योमा घर तथा कार्यालय भवनहरू हल्लाएको थियो ।
भूकम्पपछि अनेकौं परकम्पहरू आएका थिए ।
भूकम्पले ठूलो क्षति नगरेको र सुनामीको चेतावनी नदिइएको बताइएको छ ।
फुकुशिमा दाइनी आणविक भट्टीमा आणविक इन्धन चुहिएको आशंका गरिएको भए पनि पावर प्लान्टले त्यस खबरलाई खारेज गरेको छ ।
उपयोग भइसकेको आणविक इन्धन भण्डारण गर्नका लागि बनाइएको पानी नजिकैको खाल्डोमा चुहिएको भए पनि त्यसले आणविक इन्धनलाई असर नपारेको आणविक नियामक संस्थाले जनाएको छ ।
विकिरणको डोज निम्न स्तरको भएकाले कामदारहरू त्यसको चपेटामा नपरेको पनि जानकारी दिइएको छ ।
