नेकपाका उपाध्यक्ष वामदेव गौतम पार्टी एक हुनुपर्ने माग लिएर अध्यक्ष पुष्पकमल दाहाल 'प्रचण्ड'निवासमा पुगेका छन् ।

बिहीवार बिहान दुवै नेताबीच करीब १ घण्टा कुराकानी भएको थियो ।

खुमलटार स्रोतका अनुसार गौतमले प्रतिनिधि सभा पुनःस्थापनापछिको अवस्थामा पार्टीलाई एक राख्न पहल गर्ने जिम्मा प्रचण्डकै काँधमा आएको छलफलका क्रममा बताएका थिए ।

'तपाईंले अब पार्टी एकताको आह्वान गर्नुस्,' गौतमको भनाइ उदृत गर्दै स्रोतले भन्यो, 'अब बल तपाईंको कोर्टमा छ ।'

जवाफमा प्रचण्डले अझै केही दिन हेरौं भनेका थिए । 'सबै कुरा केपीजीको शैलीमा भर पर्छ । उहाँ अब कसरी अघि बढ्नुहुन्छ, त्यसरी नै आगामी बाटो तय हुन्छ ।'

प्रतिनिधि सभा विघटन भएपछि नेकपा राजनीतिक ढंगबाट दुईचीरा भएको थियो । तर उपाध्यक्ष गौतम भने कुनै पनि पक्षमा नलागी एकता महाभियान शुरू गरेका थिए ।