०२ असार २०८३, मंगलबार
डोटीको दक्षिणी क्षेत्रमा पर्ने बोगटान फुड्सिल गाउँपालिका–५ धिर्कामाडौंबासी इसरा बोहरा दम्पती आजकल खुशी छ ।
कोरोना महामारीमा जीविका चलाउन भन्दै भारत पसेका पति सन्तोष बोहरा काम नपाएर रित्तै हात घर फर्किए । उनको परिवारलाई अनुदानमा ३ बाख्रा दिइएपछि उनीहरूमा खुशीयाली छाएको छ ।
जिल्लामा वर्षौंदेखि काम गर्दै आएको सिड नेपाल नामक संस्थाले आफ्नोे दातृ संस्थाको सहयोगमा गाउँपालिकामा भएका दर्जनौं गरीब तथा विपन्न परिवारलाई निःशुल्क बाख्रा वितरण गरेपछि आफूहरूमा खुशीयाली छाएको सन्तोषले बताए ।
‘घरमा समस्या भएर कमाउनका लागि भारत गएको थिएँ, कोरोनाले कमाउन सकिनँ, घरैमा बसेको थिएँ, संस्थाका बाख्रा पाएपछि अब जीवन चलाउन सहज हुनेछ,’ उनले भने ।
उनीजस्तै वडामा बाख्रा पाएका स्थानीय, दलित तथा विपन्न परिवार अहिले निकै खुशी छन् । बाख्रापालनले जीवनयापनमा सहज भएको भन्दै गरीब तथा विपन्न वर्गमा खुशीयाली छाएको अर्का स्थानीय जवानसिंह बोहराले बताए । ‘आफूसँग बाख्रा किन्न रकम थिएन, अहिले संस्थाले घरैमा आएर निःशुल्क बाख्रा दिएकामा गरीब तथा विपन्न वर्ग खुशी भएका छन्,’ उनले भने ।
घरमा लगाइएको खेतीपातीले कम्तीमा पनि ५ महिनासम्म खान नपुग्ने गरेका विपन्न परिवारलाई बाख्रापालनबाट सहयोग होस् र आम्दानी बढोस् भनेर निःशुल्क बाख्रा वितरण गरिएको सिड नेपाल डोटीका कोषाध्यक्ष यज्ञराज जोशीले बताए । ‘रकम दिएर जीविका चलाउन नसकिने भएपछि बाख्रा दिँदा आम्दानी हुने तथा आयस्तर पनि बढ्ने अवस्था देखेपछि हामीले बाख्रा वितरण गरेका छौं, गरिखाने वर्गलाई राम्रै हुनेछ,’ उनले भने ।
संस्थाले दिएका ३ बाख्रासँगै स्थानीय किसानले आफूले पनि ऋण लिई बाख्रा किन्न थालेको धिर्कामाडौंकी दलित महिला सीतादेवी ढोलीले बताइन् । उनले भनिन्, ‘संस्थाले ३ बाख्रा दिएको छ, हामीले पनि ऋणपान गरी बाख्रा किनेका छौं, बाख्राले राम्रो आम्दानी हुने आश गरेका छौं, ५०/६० बाख्रा पुर्याएर यसलाई व्यवसायका रूपमा अगाडि बढाउने सोचमा छु ।’
