भारतीय प्रधानमन्त्री नरेन्द्र मोदी नेतृत्वको सरकारले कार्यान्वयनमा ल्याएको ‘मेक इन इन्डिया’ अभियानप्रति अमेरिकाका नयाँ राष्ट्रपति जो बाइडन प्रशासनले गम्भीर आपत्ति जनाएका छन् ।

बाइडन प्रशासनले अमेरिकी कांग्रेसमा बुझाएको रिपोर्टमा भारतको ‘मेक इन इन्डिया’ नीतिले अमेरिका–भारत द्विपक्षीय व्यापारमा चुनौती थपिएको उल्लेख गरिएको अन्तर्राष्ट्रिय सञ्चारमाध्यमले जनाएका छन् ।

सन् २०२१ का लागि यूएस ट्रेड रिप्रिजेन्टेटिभ (यूएसटीआर) ले तय गरिएको व्यापार नीतिमा भारतको ‘मेक इन इन्डिया’ अभियानले अमेरिकी निर्यातकर्तालाई असर गरेको उल्लेख छ । 

नीतिमा उल्लेख छ, ‘भारत आफ्नो ठूलो बजार, आर्थिक वृद्धि र विकासका विविध अवसरका कारण अमेरिकी निर्यातकर्ताका लागि अनिवार्य बजार बनेको छ । तर भारतको व्यापारलाई सीमित गर्ने नीतिका कारण दुवै देशको व्यापारिक सम्बन्धमा विद्यमान सम्भावना कमजोर हुँदै गएका छन् । भारतले ‘मेक इन इन्डिया’ अभियानमार्फत आयात कम गर्नतिर जोड दिनुले द्विपक्षीय व्यापार सम्बन्धमा चुनौती देखिएको छ ।’

भारतका प्रधानमन्त्री मोदीले ‘मेक इन इन्डिया’मार्फत लगानी भित्र्याउँदै भारतमै उद्योग खोलेर उत्पादन बढाउने र विदेशी वस्तु आयात कम गर्ने नीति लिएका थिए । निवर्तमान अमेरिकी राष्ट्रपति डोनाल्ड ट्रम्पले मोदीको नीतिलाई साथ दिए पनि नयाँ राष्ट्रपति बाइडन प्रशासनले अस्वीकार गर्ने संकेत देखिएको छ ।