१९ असार २०८३, शुक्रबार
प्रधानमन्त्री केपी शर्मा ओलीले आफूलाई प्रधानमन्त्रीबाट हटाउन सजिलो नभएको बताएका छन् ।
ओलीले नेपालीको लागि ‘कम्फर्टेबल’ सरकार चाहिएको भन्दै भारतको लागि ‘कम्फर्टेबल सरकार चाहिएको भन्ने पुष्पकमल दाहाल ‘प्रचण्ड’को भनाइप्रति कटाक्ष गरे ।
मंगलवार झापाको बिर्तामोडमा पूर्वाञ्चल क्यान्सर अस्पतालको उद्घाटन कार्यक्रममा ओलीले आफूलाई प्रधानमन्त्रीबाट हटाउन सजिलो नभएको बताएका हुन् ।
‘अस्तिको दिनमा बोल्दा पनि भनेको थिएँ – कसैले हटाउन सक्छ भने हटाओस् तर त्यति सजिलो छैन । आउँदो चुनावमा दुईतिहाइका साथ फेरि सिंहदरबारमा फर्किन्छु,’ ओलीले भने ।
आइतवार झापाबाटै ओलीले आफूलाई हटाएर देखाउन चुनौती दिएका थिए ।
प्रधानमन्त्री ओलीले २३ गतेबाट शुरू हुने प्रतिनिधि सभाको अधिवेशन राम्रोसँग चलाउन प्रयास गर्ने बताए । ‘प्रतिनिधिसभा व्यूँतियो मेरो काम प्रधानमन्त्रीको हैसियतमा अदालतको फैसला कार्यान्वयन गर्ने हो । २३ गतेदेखि संसद राम्ररी अगाडि बढाउने प्रयास हुन्छ, सकारात्मक भूमिका हुन्छ,’ ओलीले भने, ‘म मुद्दा हाल्न गएको पनि छैन, राजनीति गर्ने मान्छे हो । दरखास्त हाल्न जाँदा निवेदन माग्न जाँदा नेपाली जनताकोमा जान्छु ।’
प्रधानमन्त्री ओलीले नेपालीको लागि कम्फर्टेबल सरकार जरुरी रहेको बताए । ‘छिमेकीसँग हामीले राष्ट्रियहीत, नक्सा, स्वाधीनता, स्वाभिमानलाई सुरक्षित राखेर मैत्रीपूर्ण सम्बन्ध राख्ने हो । विदेशीको लागि होइन नेपाली जनतालाई कम्फर्टेबल सरकार चाहियो, नेपाली जनतालाई कम्फर्टेबल सरकार,’ ओलीले भने ।
