प्रतिबन्धका क्रममा पक्राउ परेका नेकपा विप्लव समूहका नेता कार्यकर्तालाई रिहा गर्न गृह मन्त्रालयले सर्कुलर जारी गरेको छ । सरकार र विप्लव समूहबीच ३ बुँदे सहमति भएअनुसार मन्त्रालयले विप्लव समूहका नेता कार्यकर्तालाई रिहा गर्न सर्कुलर जारी गरेको हो ।

वार्तामा भएको सहमतिअनुसार मन्त्रिपरिषद्को बिहीबार बसेको बैठकले विप्लव समूहलाई लगाइँदै आएको प्रतिबन्ध खटाइएको छ । यससँगै विगत दुई वर्षयता भूमिगत अवस्थामा रहेको विप्लव समूहले शान्तिपूर्ण रुपमा राजनीतिक गतिविधि गर्न पाउने भएको छ ।

गृहले  प्रहरी प्रधान कार्यालयलाई बिहीबार एक पत्र लेखी प्रमुख जिल्ला अधिकारीले हेर्ने मुद्दामा प्रक्रिया पुर्‍याएर छाड्न र अन्य मुद्दाको हकमा भने  सरकारी वकिलसँग समन्वय गर्न निर्देशन सर्कुलर गरेको छ ।

गृह प्रवक्ता चक्रबहादुर बुढाले विप्लवका कार्यकर्ता छाड्न सर्कुलर भइसकेको पुष्टि गरे । प्रतिबन्धका क्रममा विप्लव समूहका शीर्ष नेता धर्मेन्द्र बाँस्तोला सहित १ हजार बढी नेता कार्यकर्ता पक्राउ परेका थिए भने त्यसमध्ये हाल हिरासत र जेलमा गरी १४४ जना रहेको प्रहरीले जनाएको छ ।