बेलायतकी रानी एलिजाबेथले मेगन मर्कलको घाँटीमा घुँडाले थिचेको देखाइएको फ्रान्सको व्यंग्य पत्रिका शर्ली एब्दोले छापेको एक कार्टूनले विवाद निम्त्याएको छ । 

अमेरिकामा प्रहरी अधिकारीले घाँटी थिचेर मारेका काला जातिका जर्ज फ्लोयडसँग यसलाई तुलना गरिएको छ । 

यसअघि पैगम्बर मोहम्मदको कार्टून बनाएर विवाद खेपेको शर्ली एब्दोले बेलायती राजकुमार ह्यारी तथा उनकी पत्नी मेगनको बहुचर्चित अन्तर्वार्तापछि यस्तो कार्टून छापेको हो । उनीहरूले आफूमाथि राजपरिवारले जातिविभेद गरेको आरोप लगाएका थिए । 

पत्रिकाको पहिलो पृष्ठमा कार्टून छापिएको छ र त्यसको शीर्षक यसप्रकार छ : ‘किन मेगनले छोडिन् बकिंघम ?’

रानीले डचेज मेगनको घाँटीमा घुँडाले थिचेको देखिन्छ अनि मेगनले उत्तर दिएको छापिएको छ, ‘किनभने मैले सास फेर्नै सकिनँ ।’

ओप्रा विन्फ्रेसँगको अन्तर्वार्तामा ह्यारी र मेगनले राजपरिवारमा जातिविभेदको अनुभव गरेको बताएका थिए । अनि मेगनले आत्महत्या गर्न मन लागेको पनि भनेकी थिइन् । 

सामाजिक सञ्जालमा सर्वसाधारण तथा अभियन्ताहरूले यो कार्टून गलत तथा घृणास्पद रहेको भनी टिप्पणी गरेका छन् । 

जर्ज फ्लोयडलाई यस कार्टूनले अपमान गरेको धेरैको टिप्पणी छ ।