०५ असार २०८३, शुक्रबार
अमेरिकाको टेक्सस प्रहरीले खोजी गरिरहेको एक व्यक्तिलाई वाशिङटन डीसीमा उपराष्ट्रपति कमला ह्यारिसको घरबाहिर पक्राउ गरिएको छ ।
ती व्यक्तिको गाडीमा लामो बन्दूक र गोलीगठ्ठा भेटिएपछि उनीमाथि अनेकौं आरोप लगाइएको छ ।
पल मरे नामक ३१ वर्षीय पूर्व सैनिकलाई बुधवार अपराह्न उपराष्ट्रपतिको निवास भएको यूएस नेभल अब्जर्भेटरी नजिक सिक्रेट सर्भिसका अधिकारीहरूले पक्राउ गरेका थिए । स्थानीय प्रहरीले पछि उनलाई औपचारिक पक्राउ गरेको थियो ।
मरेमाथि खतरनाक हतियार बोकेको र दर्ता नगरिएको गोलीगट्ठा साथमा राखेको लगायतका आरोप लगाइएको छ ।
प्रहरीले पाएको जानकारीअनुसार, मरेलाई विभिन्न किसिमका मानसिक समस्या भएको थियो । उनले एआर–१५ राइफल किनेर आफ्नी आमालाई मेसेज पठाउँदै डीसीमा समस्या समाधान गर्न जान लागेको बताएका थिए ।
आफूलाई सरकारले मार्न लागेको भ्रम उनले पालेका थिए ।
घटना हुँदा उपराष्ट्रपति कमला ह्यारिस कोरोनाभाइरस महामारीले बढी असर पारेका राज्यहरूको भ्रमणमा थिइन् ।
मरे सन् २०१० देखि २०१४ सम्म सेनाको ड्रोन सञ्चालक थिए । पछि उनलाई स्वास्थ्यको कारणले अवकाश दिइएको थियो । आफूलाई पूर्व सैनिक कोषबाट पर्याप्त सहायता नभएको भनी उनले अधिकृतहरूलाई गुनासो गरेका थिए र औषधि खान पनि छोडिदिएका थिए ।
