०८ असार २०८३, सोमबार
बलिउड फिल्म चेहरेको ट्रेलर बिहीवार सार्वजनिक भएको छ । फिल्म अप्रिल ३० मा सिनेमाहलमा रिलीज गरिनेछ ।
अमिताभ बच्चन र इमरान हाशमीको मुख्य भूमिका रहेको फिल्मको पहिलो पोस्टर र टीजर जारी गर्दा रिया चक्रवर्ती देखिएकी थिइनन् ।
सुशान्त सिंह राजपूतको मृत्युको विषयमा उठेको विवादमा फसेकी रियाको भूमिका हटाइएको हो कि उनलाई रिप्लेस गरिएको हो कि भनी अनुमान चलिरहेको थियो ।
तर ट्रेलरमा रिया देखिएपछि उनको भूमिका यथावत रहेको पाइएको छ भलै ट्रेलरमा उनी एकैछिनमा बिलाउँछिन् ।
ट्रेलरभरि बच्चन र हाशमीबीच वकिल र अपराधीको रूपमा गरिएको संवादलाई महत्त्वपूर्ण मानिएको छ ।
रूमी जाफरीको लेखन तथा निर्देशनमा बनेको फिल्म मर्डर मिस्ट्री हो । यसमा सस्पेन्स र थ्रिलरलाई कायम राख्ने जिम्मेवारी बच्चन र हाशमीलाई दिइएको छ ।
फिल्म चेहरेमा रियाको भूमिका नघटाइएको र पहिला जति थियो त्यति नै रहेको बताइएको छ ।
रिया सन् २०१८ मा फिल्म जलेबीमा नायिकाको रूपमा अन्तिमपटक देखिएकी थिइन् । सुशान्तको मृत्युको विवाद तथा लागूऔषध मामिलामा फसेकी रिया जेलबाट निस्केपछिको यो पहिलो फिल्म हो ।
