काठमाडौं, १२ पुस — भारतको गोवामा १५० यात्रु सवार एक यात्रुवाहक विमान रनवेबाट चिप्लिएपछि कम्तीमा १५ यात्रु घाइते भएका छन् ।
गोवाको अन्तर्राष्ट्रिय विमानस्थलबाट उडान भर्न लागेको विमान रनवेबाट चिप्लिएपछि यात्रुहरूलाई उद्धार गर्ने क्रममा उनीहरू घाइते भएका थिए ।
घटना बिहान सबा पाँच भएको थियो । दुबईबाट मुम्बई जान लागेको जेट एयरवेजको विमान गोवाको दाबोलिम विमानस्थलमा केही समय रोकिएपछि उड्न तयार थियो । उडान हुन नसकेपछि विमान ३६० डिग्री घुमेको थियो ।
‘सबै यात्रु र विमान कर्मचारीहरूलाई सुरक्षित रूपमा उद्धार गरिएको छ,’ जेट एयरवेजले जनायो, ‘केही यात्रुलाई उद्धारका क्रममा चोट लागेको छ र उपचार चल्दैछ ।’
विमानको ल्यान्डिङ गियर ध्वस्त भएपछि विमान हिलोमा गाडिएको थियो ।
घटनाको जाँचको आदेश दिइएको छ ।
सिन्ह्वा
