म्यान्मारको सत्तामा सेनाले कब्जा गरेपछि सर्वसाधारणको जीवन मुश्किलमा परेको छ । 

शनिवार मात्र ११४ जनाको ज्यान लिएको सेनाले प्रदर्शनकारीहरूमाथि हवाई आक्रमण गरेको छ । दक्षिणपूर्वी करेन राज्यमा हवाई आक्रमण गरेपछि तीन हजार गाउँलेहरू ज्यान बचाउनका लागि थाइल्यान्डतिर भाग्न बाध्य भए । 

रोयटर्स समाचार संस्थाले स्थानीय सञ्चारमाध्यमलाई उद्धृत गर्दै करेन राज्यमा लगभग तीन हजार गाउँलेलाई जातीय सशस्त्र समूहले सुरक्षित स्थानमा राखेकोमा म्यान्मार सेनाले हवाई आक्रमण गरेको हो । थाइल्यान्ड सीमा नजिक मुतारा जिल्लामा सेनाले पाँच क्षेत्रमा हवाई आक्रमण गरेको करेन महिला संगठनले जनाएको छ । 

राहतका लागि काम गर्ने संगठन फ्री बर्मा रेन्जर्सका संस्थापक डेभिड यूबैंकले नेसनल युनियनका कम्तीमा दुई सैनिक आक्रमणमा मारिएको बताए । यूबैंकले बताएअनुसार, हवाई आक्रमण राति गरिएको थियो । रुस, चीन र अन्य देशको सहायताले बर्माको सेनाको क्षमता बढेको र यो घातक भएको उनले बताए ।