२४ जेठ २०८३, आइतबार
म्यान्मारमा सेनाको कूको विरोध गरिरहेका प्रदर्शनकारीहरूले देशको सबभन्दा ठूलो शहर यांगोनका सडकमा मंगलवार रातो रंग पोतेका छन् ।
सेनाले मारेका सयौं मानिसको शहादतलाई स्मरण गर्नका लागि सडक रातो बनाइएको हो ।
सेनाले फेब्रुअरी १ मा सत्ता लिएयता लगभग ५७० जनाको ज्यान गइसकेको छ । दिनदिनै हिंसा र अशान्ति भइरहेको छ ।
सुरक्षाकर्मीहरूले लगभग ३५ सयजनालाई पक्राउ गरेको र तीमध्ये ८० प्रतिशत हिरासतमै रहेको एसोसिएसन फर पोलिटिकल प्रिजनर्स नामक संस्थाले जनाएको छ ।
यांगोनमा प्रदर्शनकारीहरू बिहान छिट्टै उठेर सडक, पेटी र बस बिसौनीहरूमा रातो रंग छ्यापेका थिए ।
‘
रगत अझै सुकेको छैन,’ एउटा सन्देशमा लेखिएको छ ।
अर्को सन्देशमा सामान्य सैनिक जवानलाई अपराधी जनरलहरूले शोषण गरिरहेको लेखिएको थियो ।
निर्वाचित लोकतान्त्रिक सरकारलाई हटाएर सेनाले शासन हातमा लिएपछि जनतामा आक्रोशको स्थिति छ ।
केही विरोधकर्ताहरूले आफ्नो आन्दोलनलाई वसन्त क्रान्ति नाम दिएका छन् । सडकमा जुलुस, अहिंसक विद्रोह तथा भद्र अवज्ञा अभियानमार्फत राज्यको कामकाज रोक्ने कामहरू भइरहेका छन् ।
