बालिकालाई काठमाडौंको १ होटलमा काम गर्न राखेर वेश्यावृत्तिमा लगाएको आरोपमा प्रहरीले सञ्चालकलाई पक्राउ गरेको छ ।

पक्राउ पर्नेमा काठमाडौंको कोटेश्वरमा रहेको दीपलक्ष्मी गेष्ट हाउसका सञ्चालक दीप श्रेष्ठ रहेको प्रहरीको मानव बेचबिखन अनुसन्धान ब्यूरोले जनाएको छ ।

उनलाई १ महिलाले होटलमा ल्याएर जिम्मा दिएको र शुरूमा वेटरमा राखेपछि पछि वेश्यावृतिमा लगाएको प्रहरीले आरोप लगाएको छ । उनले शुरूमा होटलका ग्राहकसँगै बसेर खाना खाने र जबरजस्ती यौनसम्बन्ध राख्न लगाई पैसा असुल्ने तथा त्यो पैसा पनि नदिएर श्रम शोषण समेत गरेकाले कानूनबमोजिम कारवाही गरी पाउँ भनी परेको जाहेरीका आधारमा पक्राउ गरिएको ब्यूरोका प्रवक्ता अनुरागकुमार द्विवेदीले बुधवार एक सूचना जारी गरी जनाएको छ ।

उनका विषयमा अदालतबाट म्याद थप गरी अनुसन्धान जारी छ । 

यता, काठमाडौंको तारकेश्वर नगरपालिका–६ धर्मस्थली कुशलस्थित सडक नजिक नुवाकोट लिखुँ गाउँपालिका–४ बस्ने ५२ वर्षीय माइला पुतुवार शुक्रवार मृत अवस्थामा फेला परेका छन् । उनी सोही ठाउँस्थित धर्मस्थली बस्ने मंगल पुतुवारकामा पाहुना लाग्न आएको बुझिएको प्रहरी प्रधान कार्यालयले जनाएको छ ।