काला जातिका फ्लोयडलाई घाँटी थिचेर मार्ने प्रहरी अधिकृतलाई ७५ वर्षको सजाय

अमेरिकाको मिन्नियपोलिसमा काला जातिका पुरुष जर्ज फ्लोयडको घाँटीमा नौ मिनेटसम्म घुँडा राखेर मार्ने प्रहरी अधिकृत डेरेक चोभिनलाई ७५ वर्षको कारावास सजाय पाउने गरी दोषी ठहर गरिएको छ । 

उनीविरुद्ध तीनवटा अभियोग लागेकोमा तीनैवटामा दोषी ठहर गरिएको हो । काला जातिको अधिकारका लागि भइरहेको संघर्षमा यसलाई ठूलो जीतका रूपमा हेरिएको छ । 
 

चोभिनलाई सजाय दिनुअघि ज्युररहरूले दुई दिनसम्म १० घन्टाभन्दा बढी छलफल गरेका थिए । 
 

मिन्नियपोलिसको हेन्नेपिन काउन्टी कोर्टहाउसमा मास्क लगाएर उपस्थित भएका चोभिनले दोषी ठहर गर्ने फैसलामा कुनै प्रतिक्रिया दिएनन् । 

पछि उनको धरौटी रद्द गरिएको थियो र उनलाई हत्कडी लगाएर अदालतको छेउको ढोकाबाट निकालिएको थियो । 

उनलाई पछि मिन्नेसोटाको स्टिलवाटरस्थित कारागार लगिएको थियो । 
 

चोभिनले फ्लोयडको घाँटीमा घुँडाले थिचेर मार्ने उद्देश्य नराखिकनै मारेको पाइयो । अनि चोभिनले पागल मनस्थिति राखेर काम गरेको पनि ठहर भयो । र फ्लोयडको मृत्यु हुने गरी चोभिनले दण्डनीय लापरवाही गरेको पनि ठहरियो । 
 

चोभिनलाई दुई महिनाभित्र अन्तिम सजाय सुनाइने भएको छ । 

घटनाको ११ महिनापछि चोभिनलाई दोषी ठहर गरिएको हो । सन् २०२० को मे २५ मा चोभिनले फ्लोयडको घाँटी र ढाडमा ९ मिनेट २९ सेकेन्डसम्म घुँडा राखेका थिए । फ्लोयडले सास फेर्न सकिनँ भनी बारम्बार भने र अन्तिममा उनको सास गयो । 

अमेरिकाको फौजदारी न्याय प्रणालीले काला जातिका मानिसलाई अमानवीय व्यवहार गर्ने भनी काला अमेरिकीहरूले लगाउने आरोपलाई फ्लोयडको हत्याको भिडियोले पुष्टि गरेको थियो । उक्त घटनापछि देशभरि व्यापक विरोध प्रदर्शन भएको थियो अनि लुटपाटका घटना पनि भएका थिए ।