कोरोनाका कारण पर्यटन र चलचित्र क्षेत्र संकटमा पर्‍यो : अध्यक्ष गोल्छा

नेपाल उद्योग वाणिज्य महासंघका अध्यक्ष शेखर गोल्छाले कोरोनाका कारण पर्यटन र चलचित्र क्षेत्र संकटमा परेको बताएका छन् ।

द स्काइ मुभिज प्रालि र उमा फिल्मस् प्रालिले संयुक्त रूपमा निर्माण गरेको ‘त्यो तिम्रो चोखो प्रेमको नजर ...’ म्यूजिक भिडियो शुक्रवार सार्वजनिक गर्दै उनले पर्यटन र चलचित्र क्षेत्र कोरोनाका कारण नराम्ररी प्रभावित हुन पुगेको बताए ।


Advertisement

‘तंग्रीन लागेको पर्यटन र चलचित्र क्षेत्र फेरि कोरोनाको मारमा परेको छ, पर्यटन र चलचित्र क्षेत्रमा परेको समस्या समाधानका लागि महासंघले पहल गर्छ,’ उनले भने । 

नेपाल चलचित्र विकास बोर्डका अध्यक्ष दयाराम दाहालले स्वास्थ्य मापदण्डलाई पालना गर्दै चलचित्र क्षेत्रलाई अगाडि बढाउन सरकारले विशेष योजना ल्याउनुपर्ने बताए । विगत १४ महिनादेखि नेपालको चलचित्र क्षेत्र अस्तव्यस्त बन्दै गएको उनको भनाइ थियो । 

नेपाल चलचित्र निर्माता संघका अध्यक्ष एवं सार्वजनिक भएको म्युजिक भिडियोका निर्माता आकाश अधिकारीले सरकारले नेपाली चलचित्र क्षेत्रको विकासका लागि वार्षिकरुपमा विशेष कार्यक्रम ल्याउनुपर्ने बताए । नेपाल उद्योग वाणिज्य महासंघ, चलचित्र क्षेत्रका संयोजक समेत रहेका अधिकारीले नेपाली चलचित्रलाई अन्तर्राष्ट्रियकरण गर्न पहल गर्नुपर्ने उल्लेख गरे ।

चलचित्र संघका अध्यक्ष मधुसुदन प्रधान, नेपाल राष्ट्र बैंकका पूर्व डेपुटी गर्भनर चिन्तामणि सापकोटा, उमा फिल्मस् प्रालिका अध्यक्ष उमा गिरी, नेपाली सेनाका मेजर डीबी खड्का लगायतले राष्ट्रप्रति आस्था र योगदान झल्केको म्यूजिक भिडियोलाई राष्ट्रिय महत्त्वको गीतमा समावेश गर्नुपर्ने बताएका थिए ।

चलचित्र र पर्यटन क्षेत्रलाई जोडेर निर्माण गरिएको देशभक्ति गीत राराताल वरपर छायांकन गरिएको थियो ।

कमेन्ट गर्नुहोस्