०६ असार २०८३, शनिबार
भारतको महाराष्ट्रमा गत शुक्रवार विजय वल्लभ अस्पतालमा रहेको आईसीयूमा अत्यधिक स्यानिटाइजरको उपयोग गरिएकाले हावामा अल्कोहलको मात्रा बढी भएर आगलागी भएको अग्नि विशेषज्ञ नीलेश उकुन्देले बताएका छन् ।
उक्त घटनामा १५ जना रोगीको ज्यान गएको थियो ।
उकुन्दे आधिकारिक फरेन्सिक अग्नि अनुसन्धाता हुन् र उनी अस्पतालमा भएको आगलागीको अनुसन्धान गरिरहेका छन् । उनका अनुसार, सबै कोभिड अस्पतालले हातमा, रोगीका लागि र भुइँ सफा गर्न स्यानिटाइजर प्रयोग गरिरहेका छन् ।
अप्रिल ९ मा नागपुरको वादीमा एक निजी अस्पतालको आईसीयूमा पनि आगलागी हुँदा कोभिडका चारजना रोगीको ज्यान गएको थियो ।
‘स्यानिटाइजरमा भएको अल्कोहलको उच्च मात्रा आईसीयू र वार्डको वातावरणमा पाइन्छन् । यो हलुका हुनाले छतमा गएर टाँसिन्छ । हावा निस्कने भेन्टिलेसन छैन भने अल्कोहल त्यहीँ बसिरहन्छ र शर्ट सर्किट भएमा हावामा रहेको अल्कोहल हुर्र बल्छ अनि केही सेकेन्डभित्रै सबै कुरा डढाइदिन्छ,’ उकुन्देले भने ।
एसीको तारमा शर्ट सर्किट हुँदा विरारको अस्पतालमा आगो लागेको हो ।
आईसीयूमा क्रस भेन्टिलेसन थिएन । सबै कोभिड अस्पतालमा प्राकृतिक वा कृत्रिम क्रस भेन्टिलेसन हुनुपर्र्छ ताकि छतमा टाँसिएको हावा बाहिर जान पाओस्, उनले बताए ।
अनि आईसीयूमा प्रवेश गर्न र निस्कन एउटा मात्र ढोका थियो जुन आफैंमा एक समस्या हो ।
