भारतको बिहार राज्यमा पटना नजिक अलाउद्दीनचक गाउँबाट मुटु कँपाउने खबर आएको छ । 

आफ्ना चारजना बालबालिकालाई कोरोनाको कहरबाट जोगाउनका लागि मातापिताले एउटा झुप्रोमा बन्द गरेका थिए । तर झुप्रोमा आगो लागेपछि चारै बालबालिका जिउँदै जलेर मरे । 

बच्चाहरूलाई झुप्रोमा राखेर ढोका थुनी मातापिता खेतमा काम गर्न गएका थिए । तर झुप्रोमा अचानक आगो लाग्यो र चारै बच्चा जले । 

गाउँमा शोकको लहर दौडिएको छ । मातापिता रोएर बेहाल छन् । 

दलित पासवान परिवार गरीब छ र झुप्रोमा बस्ने गर्छ । घरमा तीन छोरा र एक छोरी थिए । गाउँमा कोरोना फैलिएकाले बच्चाहरू बाहिर जाँदा संक्रमित होलान् भनी मातापिताले झुप्रोमा ढोका लगाएर भित्र राखी खेत गएका थिए । 

झुप्रोमा आगो लागेपछि गाउँलेहरूले निभाउने कोशिश गरेका थिए तर बच्चाहरूलाई जोगाउन सकेनन् । 

बच्चाहरू डढेर अनुहार पनि चिन्न नसकिने भएका थिए । 

सूचना पाएपछि पुनपुन थानाको प्रहरी घटनास्थल पुगेको थियो र चारै बच्चाको शवलाई पोस्टमोर्टमका लागि पठाएको थियो ।