२२ जेठ २०८३, शुक्रबार
दाङमा भारतीय नम्बर प्लेटको कारभित्र फेला परेका ३ बालकको शव पहिचान भएको प्रहरीले जनाएको छ । तुलसीपुर उपमहानगरपालिका–६ मा आरजे ०१ सीसी ०८८५ नम्बरको भारतीय कारमा मृत भेटिएका उनीहरुको पहिचान खुलेको हो ।
बालकहरु तुलसीपुर उपमहानगरपालिका–६ गाइडर बस्ने भीमबहादुर परियारका १० वर्षीय छोरा सन्देश, किरण परियारका ७ वर्षीय छोरा करण र सन्तोष परियारका ७ वर्षीय छोरा सुवर्ण भएको खुलेको जिल्ला प्रहरी प्रमुख एसपी गणेश चन्दले दिए ।
तुलसीपुर–६ स्वर्गद्वारी टोलमा पार्किङ गरी राखिएको गाडीभित्र शनिवार बेलुकी उनीहरू मृत भेटिएका थिए ।
तीनैजना बालक वैशाख १६ गतेदेखि हराएको भन्दै १७ गते इलाका प्रहरी कार्यालय तुलसीपुरमा निवेदन परेको थियो । चन्दका अनुसार प्रहरीले अनुसन्धानका लागि गाडी मालिक यादवप्रसाद गैरे र चालक पदम बस्नेतलाई नियन्त्रणमा लिएको छ । उक्त भारतीय गाडी चैतमा नै गैरेले ल्याएको खुलेको छ ।
उनीहरूलाई इलाका प्रहरी कार्यालय तुलसीपुरको हिरासतमा राखेर अनुसन्धान भइरहेको त्यहाँका प्रमुख डीएसपी शिव सिंहले जानकारी दिए ।
मृतक बालकका आफन्तले हत्या भएको दावी गर्दै हत्यारा पक्राउ गरी कार्वाही गर्न माग गरेका छन् ।
