लुम्बिनी प्रदेशसभा विशेष अधिवेशन आइतवारदेखि शुरू हुँदैछ । आइतबार दिउँसो १ बजेका लागि प्रदेश सभाको विशेष अधिवेशन आह्वान भएको हो ।

कोरोना महामारीको समयमा पनि प्रदेशसभा सदस्यको पीसीआर जाँच विनै बैठक बस्न लागेको छ । 

एमालेका प्रदेशसभा सदस्य भोजप्रसाद श्रेष्ठलाई कोरोना पोजेटिभ देखिएको छ । उनी घरमै आराम गरेर बसिरहेका छन् । महामारीमा पीसीआर जाँच विनै सभा बस्न लागेको प्रदेशसभा सचिव दुर्लभकुमार पुन मगरले जानकारी दिए ।

‘यो विषयमा सोचिएन । माननीयहरू आ–आफ्नो गृहजिल्लामा हुनुहुन्छ । आज बैठक शुरू हुने बेलासम्म आउनुहोला । त्यसैले स्वास्थ्य मापदण्ड पालना गरेर बैठक बस्नेछ,’ उनले लोकान्तरसँग भने, ‘एमालेका १ जना माननीयज्यूलाई कोभिड देखिएको छ । उहाँ सभामा मतदानमा सहभागी हुन पाउनुहुनेछ ।’

एमाले प्रमुख सचेतक भूमिश्वर ढकालले कुनै पनि प्रदेशसभा सदस्यहरूको पीसीआर जाँच नभएको बताए ।  

कोरोना संक्रमित भएका एमाले सांसद श्रेष्ठले सबै सांसदको पीसीआर जाँच अनिवार्य गर्नुपर्ने भए पनि त्यसतर्फ सभामुख पूर्णबहादुर घर्तीले ध्यान नदिएको बताए । श्रेष्ठले लोकान्तरसँग भने, ‘म कोभिड भएर घरमै आराम गरेर बसेको छु । परिवारमा पनि संक्रमण देखिएको छ । सबै माननीयको पीसीआर जाँच गर्नुपर्नेमा प्रदेशसभा ध्यान दिएन । मेरो मतदानको अधिकार सुनिश्चित हुनुपर्छ । सभामा बोल्न पनि पाउनुपर्छ ।’ 

गण्डकी प्रदेश सभामा आवाज उठेपछि सबै सांसदको पीसीआर जाँच माग गरिएको थियो । सभामा मुख्यमन्त्री शंकर पोखरेलविरुद्ध प्रदेशसभा सचिवालयमा दर्ता भएको अविश्वासको प्रस्ताव आइतवार पेश हुनेछ ।

नेकपा माओवादी केन्द्रका संसदीय दलका नेता तथा मुख्यमन्त्रीमा प्रस्तावित कूलप्रसाद केसीले अविश्वासको प्रदेशसभा बैठकमा प्रस्ताव टेबुल गर्नेछन् । वैशाख ६ गते नेपाली कांग्रेस, नेकपा माओवादी केन्द्र र जनता समाजवादी पार्टी (जसपा) नेपाल सहितका ४१ सांसदले मुख्यमन्त्री शंकर पोखरेलविरुद्ध अविश्वासको प्रस्ताव दर्ता गराएका थिए । तर जसपाका ४ सांसद मन्त्री बनेर सरकारमा सहभागी भएका थिए ।