०६ असार २०८३, शनिबार
चिनियाँ कम्युनिस्ट पार्टीले वीबो नामक सामाजिक सञ्जालमा चलाएको अकाउन्टमा भारतको कोभिड संकटलाई मजाक उडाएको तस्वीर सार्वजनिक गरिएपछि चौतर्फी आलोचना भइरहेको छ ।
कम्युनिस्ट पार्टीको केन्द्रीय राजनीतिक तथा कानूनी मामिला आयोगको अकाउन्टमा विवादास्पद तस्वीर राखिएको हो ।
उक्त पोस्टमा दुईवटा तस्वीर सँगै राखिएको थियो । एउटा तस्वीरमा चीनले रकेट प्रक्षेपण गरेको अनि अर्कोमा भारतमा शवको दहन गरेको देखाइएको छ ।
‘चीनमा आगो बाल्ने विरुद्ध भारतमा आगो बाल्ने,’ क्याप्सनमा लेखिएको छ ।
यस तस्वीरलाई चीनका इन्टरनेट प्रयोगकर्ताहरूले असंवेदनशील भन्दै आलोचना गरेका छन् ।
उनीहरूले यो पोस्ट अनुपयुक्त रहेको र चीनले भारतप्रति सहानुभूति प्रकट गर्नुपर्ने बताएका छन् ।
चीन सरकारको मुखपत्र मानिने ग्लोबल टाइम्सका प्रधानसम्पादक हु सिजिनले लेखे, ‘अहिले मानवीयताको ध्वजा उच्च पारौं, भारतप्रति सहानुभूति देखाऔं र चिनियाँ समाजलाई नैतिकताको उच्च भूमिमा राखौं ।’
चीनले बिहीवार आफ्नो स्थायी अन्तरिक्ष स्टेसनको प्रमुख मोड्युलक प्रक्षेपण गरेको थियो । उक्त स्टेसनमा लामो समयसम्म अन्तरिक्षयात्रीहरू राखिनेछन् ।
