काठमाडौं १६ जेठ– प्रमुख प्रतिपक्षी दल नेकपा एमाले उपस्थित नभएपछि राजनीतिक सहमतिको आधारमा प्रधानमन्त्री चयनवारे सहमति जुटाउन बसेको सर्वदलीय बैठक निश्कर्षविहीन भएको छ ।
संसद भवन नयाँ वानेश्वरमा मंगलवार बिहान बसेको संसदमा प्रतिनिधित्व गर्ने दलको सर्वदलीय बैठकमा एमाले उपस्थित नभएपछि बैठक निश्कर्षविहीन भएको हो ।
बैठकमा कांग्रेस सभापति शेरबहादुर देउवाले संसदको ठूलो दलको नेताको हैसियतमा आफ्नै नेतृत्वमा सरकार गठन गर्न सहमतिका लागि आग्रह गरेका थिए । देउवाको प्रस्तावमा अन्य दलका नेताहरुले भने देशलाई कसरी निकास दिने भनि प्रश्न गरेका नेपाल मजदुर किसान पार्टीका सांसद प्रेम सुवालले लोकान्तरलाई जानकारी दिए ।
सुवालले देउवासँग देशको सार्वभौमिकता र स्वतन्त्रताको रक्षा तथा मुलुकको विकास निर्माण र भूकम्प पछिको पुननिर्माणवारे योजना माग गरेका थिए ।
बैठकमा प्रधानमन्त्री पुष्पकमल दाहाल प्रचण्डले सहमतीय सरकार गठनका लागि दलहरुसँग आग्रह गरेका थिए । उनले कांग्रेससँगको सहमति अनुसार नै आफूले प्रधानमन्त्री पदबाट राजीनामा दिएको बताए ।
कुनै सहमति नभएपछि बुधवार पुनः बैठक बस्नेगरी नेताहरु बैठकबाट बाहिरिएका थिए । राजनीतिक सहमतिको सरकार गठनका लागि राष्ट्रपति बिद्या भण्डारीले दिएको एक हप्ताको समयावधी बुधवार सकिँदैछ ।
