२५ जेठ २०८३, सोमबार
प्रधानमन्त्री एवं नेकपा अध्यक्ष केपी शर्मा ओलीले पार्टीको सरकारलाई ढालिछाड्ने र विरोधीहरूको दिग्विजय गराई उत्सव मनाउनेजस्तो घातक काममा नलाग्न पार्टीका नेता कार्यकर्तालाई आह्वान गरेका छन् ।
आइतवार एक विज्ञप्ति प्रकाशित गर्दै ओलीले व्यक्तिका स्वार्थ, असन्तुष्टि र इर्श्यामा पार्टीको आन्दोलनलाई लगाउन नहुने बताएका हुन् ।
‘आफ्नो पार्टीलाई फुटाउन, ढाल्न, पराजित गर्न र विरोधीहरूको स्वार्थलाई मलजल गर्न कतै फ्लोर क्रस गर्ने, कतै अविश्वास प्रस्ताव राख्ने र कतै केही नलागे सामूहिक राजीनामा गरी/गराई आफ्नो राजनीतिक जीवन नै समाप्त पारेर भए पनि पार्टीलाई पछारी छाड्नेजस्ता हानिकारक प्रयास भएका छन्,’ ओलीले अपिलमा भनेका छन्, ‘कुनै पनि तहमा पार्टीका सरकारलाई ढालि छाड्ने र विरोधीहरूको दिग्विजय गराएर उत्सव मनाउनेजस्ता घातक र दुःखद् प्रवृत्तिहरू पनि आज देखा परेका छन् । यी प्रवृत्ति कुनै पनि हिसाबले उपयुक्त होइनन् र यी हानिकारक छन् ।’
माधव नेपाल पक्षका सांसदहरूले राजीनामा गर्न लागेको प्रति संकेत गर्दै ओलीले त्यस्तो घातक काममा नलाग्न आग्रह गरेका छन् ।
‘के यस्ता क्रियाकलापमा सरिक हुनेलाई इतिहासले माफी गर्ला ? सोचौं, भोलि हामी जनतालाई के जवाफ दिन्छौं ? तसर्थ, यस्तो अपराध कर्ममा जानी/नजानी कुनै पनि हिसाबले संलग्न नहुन म पार्टी अध्यक्षको हैसियतले सबैलाई हार्दिक आह्वान र आग्रह गर्दछु । यो पार्टी हामीले बनाएको हाम्रो पार्टी हो । यस पार्टीका इमान्दार नेता कार्यकर्ता पार्टीलाई हानी पुग्ने र आन्दोलनलाई क्षति पुर्याउने कुनै पनि क्रियाकलापमा संलग्न हुँदैनन् भन्नेमा म विश्वस्त छु,’ ओलीले भनेका छन् ।
हेर्नुहोस्, ओलीको विज्ञप्ति :
