१५ असार २०८३, सोमबार
अमेरिकाको मेरील्यान्डमा एक बन्दूकधारीले अन्धाधुन्ध गोली चलाउँदा एक नेपाली युवकसहित चारजनाले ज्यान गुमाएका छन् ।
मृतक नेपाली युवकको नाम सागर घिमिरे भएको बाल्टिमोर सन पत्रिकाले खबर दिएको छ ।
शनिवार भएको घटनामा वूडलनस्थित घरबाहिर बसिरहेको बेलामा घिमिरेलाई उनका छिमेकीले गोली हानेर हत्या गरेका हुन् । ती छिमेकीको मानसिक असन्तुलन रहेको बताइएको छ ।
सागरका काका कप्तान घिमिरेका अनुसार, सागरले साउथ क्यारोलाइनाको क्लाफलिन विश्वविद्यालयबाट कम्प्युटर साइन्समा स्नातक तह सिध्याएका थिए र स्नातकोत्तर पढ्नका लागि मेरील्यान्ड आएका थिए ।
सागरले अमेरिकाबाटै नेपालका गरीबगुरुवाको सहायता गर्न खोजेका थिए । उनले एड्स लागेका एक नेपालीको स्वास्थ्योपचारका लागि चन्दा उठाउने कार्यक्रम समेत सञ्चालन गरेका थिए ।
सोमवार कप्तान घिमिरे र उनका दुई सन्तान क्यालिफोर्नियाबाट बाल्टिमोर जानेछन् र सागरको दाहसंस्कार गर्नेछन् ।
उनीहरूलाई बाल्टिमोर काउन्टीका विधायक ह्यारी भण्डारीले सहयोग गर्नेछन् । भण्डारीले शनिवार कार क्याराभ्यान र्यालीका दौरान गोलीकाण्डको बारेमा सुनेको बताए । आफू घटनास्थल पुगेको र घिमिरेको परिवारसँग सम्पर्क गरेको जानकारी पनि उनले दिए ।
