भारतमा कोरोनाभाइरसका कारण स्वास्थ्य प्रणाली ध्वस्त भएपछि मानिसहरू धर्मको शरण पर्न थालेका छन् । 

कोही गाईको गोबर र गहुँत शरीरमा दलेर कोरोना भगाउन खोज्दैछन् भने कोही पूजापाठ र यज्ञहवन गराउँदैछन् । 

उत्तर प्रदेशको सहारनपुरमा बजरंग दलले कोरोना रोक्नका लागि भन्दै बाल्टिनमा हवन गरेको छ र हनुमान चालीसा पढ्दै बाल्टिनको धूवाँले गल्लीहरू पवित्र पारेको भन्दै हिँडेको छ । 

बजरंग दलका प्रान्त संयोजक विकास त्यागीले हवन सामग्रीको धूवाँले नै गल्लीहरूमा कोरोना संक्रमण अन्त्य गर्ने बताएका छन् । 
 

हरियाणाको झज्जरमा पनि कोरोना भगाउनका लागि यस्तै तरिका अपनाइएको छ । धुनी बालेर शहरभरि यात्रा गरिएको छ । कोरोनाबाट मुक्तिका लागि घरघरमा यज्ञ गर्ने भनिएको छ । 

गाउँमा पनि ट्रलीमा हवनकुण्ड राखेर यात्रा निकालिएको छ । 

मध्य प्रदेशकी पर्यटन तथा संस्कृति मन्त्री उषा ठाकुर यज्ञ हवनको उपचार आवश्यक भएको बताउँछिन् । 
 

कानपुरको एक अस्पतालमा दुई महिलाले कोरोना रोगीको अक्सिजन मास्क फुकालेर हनुमान चालीसा पाठ गरेको पनि देखियो । रोगीको ज्यान केही समयपछि गएको थियो ।

यसअघि उत्तर प्रदेशको महाराजगञ्जमा महिलाहरूले कोरोना भगाउने भन्दै नौ दिनसम्म पूजा गरेका थिए । 

धार्मिक आस्थाले मानसिक शान्ति त देला तर कोरोनाको उपचार त एलोप्याथिक चिकित्सक र औषधिबाट मात्र सम्भव छ ।