अस्ट्रेलियाको एडिथ कोवेन विश्वविद्यालयले गरेको अनुसन्धानमा फलफूल तथा सागपात खाँदा तनाव घट्ने पाइएको छ । 

कुल ८६ सय मानिसहरूमा गरिएको अध्ययनमा ४७० ग्राम फलफूल र सागपात खानेहरूमा तनाव १० प्रतिशत घटेको पाइयो । विश्व स्वास्थ्य संगठनले पनि तनाव घटाउन फलफूल खाने सल्लाह दिन्छ । 

क्लिनिकल न्युट्रिसन नामक जर्नलमा प्रकाशित अध्ययनअनुसार, अध्ययनमा २४ देखि ९४ वर्षसम्मका मानिसलाई सहभागी गराइएको थियो । अनुसन्धाता सिमोन रेडभेल्लीले फलफूल र सागपातको सीधा कनेक्सन मस्तिष्कसँग रहेको यस अध्ययनबाट पुष्टि भएको बताए । 

सिमोन भन्छिन्, ‘मस्तिष्कसम्बन्धी रोग अस्ट्रेलिया लगायत संसारभरि बढिरहेका छन् । केही समयसम्म तनाव रहेर हराए त ठीकै छ तर यो लामो समयसम्म बस्यो भने त्यसको सीधा असर मस्तिष्कमा पर्छ । अनि यसले मुटुरोग, मधुमेह, डिप्रेसन र छटपटी लगायतका समस्या निम्त्याउँछ ।’

फलफूल र सागपातमा भिटामिन, मिनरल, फ्लेभेनोयड्स र क्यारोटिनोयड्स हुने र त्यसले तनाव घटाउन सहयोग गर्ने सिमोनको भनाइ छ । यसले मस्तिष्कलाई शान्त बनाउँछ ।