सुदूरपश्चिम प्रदेश कोभिड संकट व्यवस्थापन केन्द्रले गेटा मेडिकल कलेजका नवनिर्मित भवनमा आइसोलेसन सेन्टर निर्माणका लागि ५० लाख रुपैयाँ उपलब्ध गराउने निर्णय गरेको छ ।

रकम जिल्ला संकट व्यवस्थापन केन्द्र कैलालीलाई दिने निर्णय भएको छ ।

जिल्ला अस्पताल बैतडीमा नमूना परीक्षण गर्ने पीसीआर मशिन सञ्चालन गर्न, आवश्यक स्वास्थ्य सामग्री खरिद गर्न बैतडीकै रुदेश्वर स्वास्थ्य चौकी, दार्चुलाको देवल स्वास्थ्य चौकी, डोटीको दौड स्वास्थ्य चौकी र अछामको कमलबजार नगरपालिकालाई समेत गरी थप १ करोड ५० लाख उपलब्ध गराउने निर्णय भएको सुदूरपश्चिम प्रदेश, कोभिड संकट व्यवस्थापन केन्द्रका संयोजक एवं मुख्यमन्त्रीका प्रमुख स्वकीय सचिव शिवसिंह ओलीले बताए ।

प्रदेशमा गत २ दिनमा केही घटेको देखिएको कोरोना भाइरसको संक्रमण दरको ‘ग्राफ’ पछिल्लो २४ घण्टामा फेरि उकालो लागेको छ ।

स्वास्थ्य निर्देशनालय दीपायलको तथ्यांकका अनुसार गत २४ घण्टामा पीसीआर र एन्टिजेन पद्धतिबाट जम्मा २ हजार २०५ जनाको नमूना परीक्षण गर्दा झण्डै ४३ प्रतिशत अर्थात् ९५३ जनामा संक्रमण भएको छ । 
 
यसअघि सोमवार १ हजार ५३५ जनाको नमूना परीक्षण गर्दा झण्डै ३७ प्रतिशत अर्थात् ५६३ जनामा र मंगलवार १ हजार ७०३ जनाको नमूना परीक्षण गर्दा ४१ प्रतिशत अर्थात् ६९९ जनामा संक्रमण देखिएको थियो । 

निर्देशनालयका अनुसार पछिल्लो २४ घण्टामा प्रदेशका कैलालीका ७, कञ्चनपुरका ६ र बाजुरा तथा दार्चुलाका १/१ गरी १५ जना संक्रमितको मृत्यु भएको छ । प्रदेशको ‘रेफरल’ अस्पतालका रूपमा रहेको सेती प्रादेशिक अस्पताल धनगढीमा भइरहेको अक्सिजनको अभावपछि अस्पतालमा ३३ थान अक्सिजन कन्सन्ट्रेटर जडान गरिएको छ ।

जडानसँगै अस्पतालमा कोरोनाबाट संक्रमित बिरामीको उपचार व्यवस्थापन केही सहज भएको अस्पतालद्वारा जारी विज्ञप्तिमा जनाइएको छ ।