२२ जेठ २०८३, शुक्रबार
बीबीसीमा प्रसारण गरिएको बेलायती राजकुमारी डायनासँगको अन्तर्वार्ताका लागि उक्त संस्थाले माफी मागेको छ ।
अन्तर्वार्ता लिनका लागि पत्रकार मार्टिन बशीरले गलत विधि अपनाएको भनी अनुसन्धानमा खुलेपछि बीबीसीले माफी मागेको हो ।
उक्त अन्तर्वार्ताका कारण आफ्नी आमा डायनाको डर झनै बढेको र आमाबुवाको सम्बन्ध बिग्रिएको भनी राजकुमार विलियम्सले बीबीसीको आलोचना गरेका छन् ।
आफ्नी आमालाई बीबीसीले धोका दिएको उहाँले कहिल्यै थाहा पाउनुभएन र त्यसले आफूलाई दुःखी तुल्याएको विलियम्सको भनाइ छ ।
आमालाई एउटा फटाहा पत्रकारले मात्र नभई बीबीसीका हाकिमहरूले पनि धोका दिएको विलियम्सले बताए ।
आमाको मृत्युमा पनि विषाक्त मिडिया संस्कृति जिम्मेवार रहेको विलियम्सले आरोप लगाए ।
सन् १९९५ मा गरिएको उक्त अन्तर्वार्ताका लागि बशीरले अपनाएको तरिकालाई बीबीसीले लुकाएको थियो ।
त्यसको स्वतन्त्र अनुसन्धान प्रतिवेदनमा अन्तर्वार्ता कसरी लिइएको थियो भन्ने जानकारी छापिएको छ ।
अनुसन्धान टोलीका अध्यक्ष पूर्व न्यायाधीश लर्ड डायसनले भने, ‘अन्तर्वार्ताका लागि उपयोग गरिएका तरिकाले बीबीसीको पहिचान बनेको इमान्दारी र पारदर्शिताको उच्च मापदण्डलाई पालन गरेको थिएन ।’
प्रतिवेदनका अनुसार, बशीरले डायनासँगको भेटघाटका लागि उनका दाइ अर्ल स्पेन्सरको विश्वास जितेको थियो र विश्वास जित्न बशीरले झूटा कागजात देखाएका थिए ।
कसैलाई कीर्ते कागजात नदेखाएको भनी बीबीसीमा व्यवस्थापकहरूसँग झूटो बोलिएको थियो ।
मार्टिन बशीरले बयान जारी गरेर ती दस्तावेजहरूका लागि माफी मागेका छन् र राजकुमारी डायनासँगको अन्तर्वार्ता गौरवको क्षण भएको बताएका छन् ।
उनले भने, ‘अन्तर्वार्ता दिने निर्णय राजकुमारीको निजी निर्णय थियो र बैंकका कागजातसँग त्यसको कुनै सम्बन्ध थिएन ।’
बीबीसी पानोरामाका प्रसारण गरिएको उक्त अन्तर्वार्तामा त्यसबेलाको राजपरिवार, आफ्ना पति राजकुमार चार्ल्स अनि क्यामिला पार्करसँग चार्ल्सको सम्बन्धका विषयमा डायनाले खुलेर कुरा गरेकी थिइन् ।
बीबीसीका लागि त्यो अन्तर्वार्ता निकै महत्त्वपूर्ण साबित भयो । त्यसअघि कुनै पनि टेलिभिजनमा राजपरिवारको सदस्यले परिवारका विषयमा यति खुलेर कुरा गरेको थिएन ।
पति चार्ल्सले क्यामिला पार्करसँग राखेको सम्बन्धले आफूलाई असहज बनाएको डायनाले बताएकी थिइन् ।
आफूलाई बुलिमिया अर्थात् तौल घटाउने तीव्र इच्छा भएको मानसिक समस्या रहेको पनि उनले खुलासा गरेकी थिइन् ।
पति चार्ल्सका कर्मचारीहरूले आफूविरुद्ध अभियान चलाएको पनि उनले बताइन् ।
२७ वर्षअघि आएको उक्त अन्तर्वार्तालाई २.३ करोड मानिसले हेरेका थिए ।
त्यतिखेर अन्तर्वार्ताले भयंकर विवाद निम्त्याएको थियो । अन्तर्वार्ता प्रसारित भएको केही समयपछि महारानी एलिजाबेथले छोरा चार्ल्स र बुहारी डायनालाई पत्र लेखेर पारपाचुके गर्न सुझाएकी थिइन् ।
सन् १९९७ अगस्ट ३१ मा डायना एक कार दुर्घटनामा मारिएकी थिइन् ।
डायनाका दाइ अर्ल स्पेन्सरले डायनालाई अन्तर्वार्ताका लागि मनाउन बीबीसीका पत्रकार मार्टिन बशीरले बैंकको कीर्ते स्टेटमेन्ट उपयोग गरेको आरोप लगाएका थिए ।
सन् २०२० मा उनले यस विषयमा स्वतन्त्र अनुसन्धानको माग राखेका थिए । बेइमानीपूर्वक अन्तर्वार्ता लिइएको आरोप लगाउँदै उनले अनुसन्धानको माग गरेपछि पूर्व न्यायाधीशको अध्यक्षतामा जाँचबुझ समिति बनाइएको थियो ।
