०२ असार २०८३, मंगलबार
भारतमा चिप्को आन्दोलन चलाएका प्रख्यात वातावरण अभियन्ता सुन्दरलाल बहुगुणाको शुक्रवार देहान्त भएको छ ।
कोभिड संक्रमण भएर ऋषिकेशस्थित एम्समा उनी भर्ना भएका थिए ।
उत्तराखण्डको टिहरीमा सन् १९२७ मा जन्मेका बहुगुणा हिमालय क्षेत्रमा वनजंगल संरक्षणका लागि निरन्तर लड्दै आएका थिए ।
सन् १९७० को दशकमा उनले पत्नीसँग मिलेर चिप्को आन्दोलन चलाएका थिए । रुखमा चिपिक्क टाँसिएर रुख काट्न नदिने यो आन्दोलन निकै सफल भएको थियो ।
बहुगुणाले हिमालय क्षेत्रमा ५ हजार किलोमिटर लामो यात्रा गरेर चिप्को आन्दोलनप्रति जागरुकता फैलाएका थिए । सन् १९८१ देखि १९८३ सम्म उनले यो यात्रा गरेका थिए । त्यसक्रममा उनी गाउँगाउँ पुगेका थिए ।
तत्कालीन प्रधानमन्त्री इन्दिरा गान्धीसँग उनको भेटघाटपछि गान्धीले हरिया रुख काट्न १५ वर्षसम्म प्रतिबन्ध लगाउने निर्णय लिएकी थिइन् ।
पछि सन् १९८० को दशकमा उनले टिहरी बाँधको विरोध अभियानको नेतृत्व गरेका थिए । उनी र उनका सहयोगीहरूले विशाल बाँधविरुद्ध लगायतका वातावरणीय विषयमा अभियान चलाएका थिए ।
