काठमाडौं, १९ जेठ– राष्ट्रिय आविस्कार केन्द्र खोल्ने अभियानमा रहेका महावीर पुनलाई सरकारले १ करोड ५० लाख सहयोग गर्ने निर्णय गर्दा सबैतिरबाट प्रसंशा भइरहेको छ ।
तर, स्वयं महावीर पुनले भने सहयोग रकम दिने निर्णय सुनेको भन्दै प्रधानमन्त्री प्रचण्डलाई ‘गाली’ गरेका छन् ।
म्यागासेसे पुरस्कार बिजेता पुनले उद्योग मन्त्री नविन्द्रराज जोशीसँगको व्यक्तिगत सम्बन्धका आधारमा आफूलाई डेढ करोड रुपैयाँ दिने निर्णय भएको हुन सक्ने बताएका छन् ।
साथै पुरस्कार दिने निर्णय गर्दैमा पैसा पाइहाल्ने विश्वास भने नभएको उनको भनाइ छ । ‘मन्त्रीले भन्दैमा र बजेट भाषणमा राख्दैमा पैसा पाइन्छ भन्ने कुरामा म बिश्वाश गर्दिन । त्यस्तो कुरा त डा. रामशरण महत अर्थ मन्त्री हुँदा पनि भएको थियो र अर्का अर्थमन्त्री बिष्णु पौडेलजी ले पनि भन्नु भएको थियो । त्यति बेला रामशरण जीले बजेट मै प्रष्ट रुपमा नबिन बिचार र अनुसन्धान कार्यहरुलाई सहयोग गर्ने भनेर रू. ५० करोड नै बजेटमा छुट्याइएको थियो । तर त्यो बजेट अनेकौं कारणहरु देखाएर निकासा भएन,’ पुनले सामाजिक सञ्जाल फेसबुकमा स्टाटस लेख्दै भनेका छन् ।
अहिलेको अनुदान दिने भन्ने कुरा हालको उद्योग मन्त्रीले व्यक्तिगत रुपमा मन्त्रालयमार्फत आफूप्रति देखाएको सम्मान, सद्भाव र व्यक्तिगत प्रसाय मात्रै भएको पुनको भनाइ छ । उद्योग मन्त्री जोशीले भेट्दा आफूलाई दाइ भन्ने गरेको र आफ्नो कामको ज्यादै सम्मान गर्ने गरेको पनि पुनले उल्लेख गरेका छन् ।
सहयोग दिने कुरा सत्य भएपनि त्यसलाई आफूले प्रधानमन्त्री प्रचण्ड र उनको ‘भान्से’ टीमको आफूप्रतिको सद्भाव भनेर आफूले नबुझ्ने पुनको भनाइ छ । ‘मैले यसलाई प्रधानमन्त्री प्रचण्ड र उहाँको भान्से टीमको मप्रतिको सद्भावाना भनेर पटक्कै मान्दिन । त्यसैले ढिलै भए पनि प्रधानमन्त्रीले मद्दत त गर्यो नि भनेर मक्ख नपर्न अनुरोध छ,’ पुनले फेसबुकमा उल्लेख गरेका छन् ।
प्रधानमन्त्री प्रचण्ड र उनको ‘भान्से’ टीमलाई आफूले यसो भन्नुका ठोस कारण भएको भन्दै पुनले त्यसलाई आफूले आफ्नोे जीवनी लेख्दा उल्लेख गर्ने बताएका छन् ।
