काठमाडौँ, २० जेठ - आन्दोलनरत राष्ट्रिय जनता पार्टी (राजपा) नेपालले चुनावमा सहभागी हुने निर्णय गर्न ढिलाइ गरेसँगै पार्टी सम्बद्ध कार्यकर्ता निराश भएका छन् । कार्यकर्ताले पार्टीले निर्वाचनमा सहभागी हुने निर्णय गर्न ढिलाइ गर्दा आफूहरूलाई निराश बनाउनुका साथै सङ्गठनलाई पनि घाटा लागिरहेको गुनासो गरेका छन् ।
दोस्रो चरणको चुनाव हुने निश्चित भएपछि तराई मधेशमा समेत चुनावको माहोल बनेको छ । जताततै उम्मेदवारको छनोट गर्ने कार्यका साथै चुनावी सभाहरूसमेत आयोजना भइरहेका छन् । तर, राजपा नेपाल चुनावमा जाने वा नजाने निश्चित नभएपछि सो दलका जिल्लाका नेता तथा कार्यकर्ताहरू निराश भएर अन्य पार्टीमा प्रवेश गर्न थालेको खबर आजको गोरखापत्रमा खबर छ ।
गाउँपालिका तथा नगरपालिकामा उम्मेदवार बन्ने आकाङ्क्षीहरू राजपा नेपाल छाडेर काँग्रेस, माओवादी केन्द्र, नेकपा
(एमाले) तथा सङ्घीय समाजवादी फोरम नेपाल लगायतका दलमा प्रवेश गरिरहेका समाचार आइरहेका छन् । जेठ १३ गते राजपा नेपालका महासचिव समिम मियाँ अन्सारी दलबलसहित एमालेमा प्रवेश गरे । राजपा नेपाल सुनसरीका अध्यक्ष उमेश साह पनि आफ्नो दलबलसहित जेठ १७ गते नै माओवादी केन्द्रमा प्रवेश गरेका थिए ।
उपेन्द्र यादव अध्यक्ष रहेको सङ्घीय समाजवादी फोरम नेपालले पनि राजपा नेपालका दुईजना केन्द्रीय सदस्यलाई जेठ १७ गते सप्तरीमा एक कार्यक्रम आयोजना गरी आफ्नो पार्टीमा प्रवेश गराएको छ । राजपा नेपालका भीमराज यादव र भरत साह फोरम नेपालमा प्रवेश गरे ।


पर्साका पत्रकार एवं राजनीतिक विश्लेषक चन्द्रकिशोरले मधेशको माग पूरा नभएका कारण जनतामा निराशा र आक्रोश दुवै छ तर राजपा नेपालको अनिर्णयले जनता अन्योलमा देखिएको बते । उनले आन्दोलनको शक्तिलाई मतमा परिणत गर्नुपर्ने सुझाव दिए ।