०१ साउन २०८३, शुक्रबार
भारतले तिब्बत स्वायत्त क्षेत्रलाई स्वतन्त्र मुलुकका रूपमा पहिचान गर्दैन र एक चीन नीतिमा ऊ अडिग छ ।
तर पोहोर साल लद्दाखमा भएको भिडन्तपछि भारतमा तिब्बती स्वतन्त्रताका विषयमा माहोल बन्न थालेको छ ।
यसैबीच विश्व हिन्दू परिषद्ले तिब्बतलाई चीनले कब्जा गर्नु क्षमा दिन नसकिने पाप भएको दाबी गरेको छ । तिब्बतको निर्वासित सरकारका नवनिर्वाचित प्रमुख पेन्पा छिरिङलाई आइतवार बधाईपत्र दिने क्रममा परिषद्को यो भनाइ आएको हो ।
‘दुर्व्यवहार तथा विश्वासघातमार्फत चिनियाँ कम्युनिस्ट पार्टीले तिब्बतमाथि सैन्य अतिक्रमण गरेर उपनिवेश बनाएको छ । पार्टीलाई प्रकृति र जीवनप्रति कुनै सम्मान छैन र तिब्बतको बौद्ध पहिचानलाई यो विस्तारवादी, उपनिवेशवादी तथा विषाक्त शक्तिले पूरै ध्वस्त पार्न खोज्दैछ,’ पत्रमा लेखिएको छ ।
त्यसमा परिषद्का महासचिव मिलन्द परान्दे र उपमहासचिव स्वामी विज्ञानानन्दले हस्ताक्षर गरेका छन् ।
विश्व हिन्दू परिषद् सत्तारूढ भारतीय जनता पार्टीको विचारधारात्मक सहयोगी हो ।
‘माओ च तुङको नेतृत्वमा चिनियाँ कम्युनिस्ट पार्टीले दशौं लाख मानिसलाई पीडित बनायो र उनको क्रूर शासनमा डेढ करोडदेखि साढे ५ करोडसम्म मानिस मारिएको अनुमान छ । पार्टीले ८७ हजार तिब्बतीको हत्या गरेको थियो भने एक लाख जति तिब्बतीहरू भारत, नेपाल र भुटानमा शरणार्थी बनेर बस्न बाध्य छन्,’ परिषद्ले लेख्यो ।
सन् १९५९ मा दलाई लामासँगै हजारौं तिब्बती शरणार्थीहरू भारत निर्वासित भएका थिए । उनीहरूले हिमाचल प्रदेशको धर्मशालामा निर्वासित सरकार चलाइरहेका छन् ।
