०९ असार २०८३, मंगलबार
जापानको राजधानी टोक्योमा हुन गइरहेको ओलम्पिक प्रतियोगितामा खेलाडीहरूलाई १ लाख ६० हजारवटा कन्डम बाँडिने भएको छ । तर कोभिड–१९ का कारण यौन सम्बन्ध राख्न प्रतिबन्ध लगाइएको छ ।
खेलाडीहरूलाई कन्डम बाँड्ने परम्परा ओलम्पिकमा लामो समयदेखि चलिआएको छ ।
यो वर्ष ओलम्पिकमा सहभागी ११ हजार खेलाडीहरूलाई आयोजक कमिटीले यौन सम्पर्क नगर्न आग्रह गरेको छ ।
कोभिड नफैलियोस् भनी यस्तो पूर्वसतर्कता अपनाइएको हो ।
तैपनि परम्परा धान्दै खेलाडीहरूलाई कन्डम बाँडिनेछ । एउटा खेलाडीको भागमा १४ वटा कन्डम पर्नेछ ।
ओलम्पिक आयोजक कमिटीले खेलाडीहरूका लागि ३३ पृष्ठको निर्देशक पुस्तिका सार्वजनिक गरेको छ । उनीहरूलाई भौतिक दूरी कायम गर्न र अँगालो हाल्ने तथा हात मिलाउने काम नगर्न भनिएको छ ।
एचआईभी एड्स नसरोस् भनी सन् १९८८ देखि ओलम्पिकमा खेलाडीहरूलाई कन्डम दिने गरिएको हो ।
