०१ साउन २०८३, शुक्रबार
नेपाली कांग्रेसका प्रदेशसभा सदस्य नरोत्तम वैद्यले बागमती प्रदेशसभा बैठकमा आत्मालोचना गरेका छन् ।
शनिवारको प्रदेशसभा बैठकको शुरूमा बोल्दै सांसद वैद्यले शुक्रबार बोलेको कुराप्रति आत्मालोचना गरेका छन् ।
उनले बैठकमा भने, ‘मैले बोलेको कुराले सामाजिक सञ्जालमा क्रियाप्रतिक्रिया धेरै भयो, आफूलाई लागेको कुरा संसदमा निर्धक्क बोल्न पाउने । पूर्ण वाक् स्वतन्त्रता हुने । मुद्दामामिला कहीँकतै मुद्दामामिला, कारवाही नहुने प्रावधान भएको । सार्वभौम संसदमा आफूलाई लागेको कुरा दिल खोलेर बोल्न पाइन्छ । दिल खोलेर आफ्नो विचार राख्ने सिलसिलामा भाइरल भएको अवस्थामा मेरो पार्टीको समेत ध्यान आकर्षण भएको छ । पार्टीले आत्मालोचना गर्न निर्देशन दिएकाले आत्मालोचना गरेको छु । प्रधानमन्त्रीज्यूप्रति मेरो व्यक्तिगत रिसइबीको कुरा होइन । मैले असाध्यै आवेगमा आएर आवश्यकताभन्दा बढी नै स्वतन्त्रता उपभोग गरेको अनुभुति भयो । आफ्नो अभिव्यक्ति फिर्ता लिँदै रेकर्डबाट हटाउन अनुरोध गर्दछु ।’
शुक्रवारको प्रदेशसभा बैठकमा प्रधानमन्त्री केपी शर्मा ओलीले देश खाइदिने भएकाले आफू नाथुराम गोड्से बन्न तयार रहेको अभिव्यक्ति दिएका थिए । सांसद वैद्यले स्पष्टीकरण दिन समय माग गरेकाले शनिवारको बैठकको शुरूमै बोल्न दिइएको थियो ।
नाथुराम गोड्सेले भारतमा महात्मा गान्धीको हत्या गरेका छन् । सांसद वैद्यले आफूले पनि प्रधानमन्त्री ओलीको हत्या गर्ने आशयको अभिव्यक्ति दिएपछि सर्वत्र विरोध भइरहेको छ ।
सांसद वैद्यलाई कारवाही हुनुपर्ने माग भइरहेका बेला उनले प्रदेशसभा बैठकमा माफी मागेका छन् ।
नेपालको संविधान अनुसार प्रदेशसभा बैठकमा बोलेको अभिव्यक्तिका आधारमा सांसदलाई पक्राउ गर्न र अदालतमा मुद्दा चलाउन पाइँदैन । नेपालको संविधानको धारा १८७(१) मा लेखिएको छ, ‘यस संविधानको अधीनमा रही प्रदेश सभामा पूर्ण वाक् स्वतन्त्रता रहनेछ र प्रदेश सभामा व्यक्त गरेको कुनै कुरा वा दिएको कुनै मतलाई लिएर कुनै पनि सदस्यलाई पक्राउ गर्ने, थुनामा राख्ने वा निज उपर कुनै अदालतमा कारबाही चलाइने छैन ।’
