२२ जेठ २०८३, शुक्रबार
रुपन्देहीको तिलोत्तमा नगरपालिकामा कृषि कार्यका लागि ट्रयाक्टर जोताईंको नयाँ भाडा दर कायम गरिएको छ ।
यसअघि व्यवसायीले लिँदै आएको भाडा दरलाई आवश्यकता र औचित्यको आधारमा समायोजन गरिएको हो ।
नगरपालिकाले ट्रयाक्टर धनीका प्रतिनिधि समेतको उपस्थितिमा सरोकारवालासँग छलफल गरेर नयाँ भाडा दर कायम गरिएको वडा नम्बर १३ का अध्यक्ष समेत रहेका भाडादर निर्धारण समितिका संयोजक गणेश न्यौपानेले जानकारी दिए ।
कृषिमा प्रविधिको प्रयोग बढ्दै गए पनि कृषि उपकरणको भाडादर वैज्ञानिक नहुँदा किसान मर्कामा थिए । तिलोत्तमामा सर्वपक्षीय छलफलबाट ट्रयाक्टरको कल्टिभेटर जोताई भाडा प्रतिघण्टा १ हजार ४४० र रोटाभेटर जोताई भाडा प्रतिघण्टा १ हजार ८५० कायम गरिएको छ ।
डिजलको मूल्यवृद्धि, बजारको अवस्था लगायतको आधारमा २०७७ वैशाखमा निर्धारण गरिएको भाडादरलाई समायोजन गरिएको वडाध्यक्ष न्यौपानेले बताए ।
अब तिलोत्तमा नगरपालिकामा निर्धारण गरिएभन्दा बढी भाडा लिन पाइने छैन तर ट्रयाक्टर व्यवसायीले तोकिएभन्दा कम भाडा लिन सक्नेछन् ।
तिलोत्तमा नगरपालिकामा ट्रयाक्टरको वैज्ञानिक भाडा दर कायम गर्न वडाध्यक्ष न्यौपानेको संयोजकत्वमा समिति गठन गरिएको छ । तिलोत्तमा नगरपालिकाको झण्डै ६० प्रतिशत भूभागमा कृषि कार्य हुँदै आएको छ ।
प्रमुख खाद्यबाली धान रोपाईं प्रारम्भ हुँदै गर्दा ट्रयाक्टरको नयाँ जोताइ भाडादर कायम गरिएको हो । तोकिएकोभन्दा बढी भाडा कसैले लिए सम्बन्धित निकायमा जानकारी गराउन समिति संयोजक न्यौपानेले किसानलाई आग्रह गरे ।
